اسلام آباد۔1جون (اے پی پی): وفاقی جان سلامتی ءِ وزیر سید مصطفیٰ کمال ءَ نرسنگ مافیا ءِ ھلاپ ءَ جنگ ءِ جار جتگ ءُ کرپشن ءِ بُن ھشت ءَ چہ ھلاس کنگ ءُ شفافیت ءَ را دل یکیمی کنگ ءِ ھاترا سختیں نوکیں کانود آرگ ءِ وعدہ کتگ۔ یک شمبے ءِ روچ ءَ یک انٹرویو ءِ تہ ءَ آئی ءَ درشان کت کہ نرسنگ مافیا جعلی ڈگری آنی سر ءَ زبردستی کار کنگ ءَ اِنت، نوں وھد اِنت کہ آھانی ھلاپ ءَ سکیں کارروائی کنگ بہ بیت۔ آئی ءَ گیش گوشت کہ بدکاری آنی سر ءَ کارروائی کنگ ءِ ضلورت اِنت تانکہ ایوک ءَ لائک ءُ پیشہ واریں مردماں کار کنگ ءِ اجازت دیگ بہ بیت۔ نرسنگ سیٹ آنی مزنیں لوٹ ءِ سر ءَ چمشانک دیان ءَ سید مصطفیٰ کمال ءَ گوشت کہ لھتیں ادارگ نرسنگ ءِ نوکری آنی واستہ 2لکھ ءُ نیم کلدار زورگ ءَ انت وھدیکہ ملک ءَ نوکری آنی واستہ 9لکھ کلدار زورگ ءَ انت۔ آئی ءَ نرسنگ ءِ شوبگ ءَ انصاف ءُ احتساب ءَ را دل یکیمی کنگ ءِ واستہ شفاف ءُ میرٹ ءِ سر ءَ بنیات ءِ نظام ءِ ترندیں ضلورت ءِ سر ءَ زور پر دات۔ وفاقی جان سلامتی ءِ وزیر ءَ گوشت کہ استیں حکومت نرسنگ ءِ وانگ ءُ زانگ ءَ را گہتر کنت۔ آئی ءَ شفاف داخلہ ءُ میرٹ ءِ سر ءَ بنیات ءِ سر ءَ سختیں پالیشی آنی سر ءَ ھم وتی عزم ءِ درشانی کتگ۔ وفاقی وزیر ءَ گوشت کہ جان سلامتی ءِ آسراتی آنی دیمروئی ءِ واستہ مزنیں گامگیج آنی تہ ءَ ھم کوالٹی ءِ دوائی آنی ضمانت اِنت۔ وفاقی جان سلامتی ءِ وزیر سید مصطفیٰ کمال ءَ جان سلامتی ءِ شوبگ ءَ را گہتر کنگ ءِ حکومت ءِ عزم ءِ سر ءَ زور پر دیان ءَ کوالٹی ءِ دوائی آنی دستیابی ءَ را دل یکیمی کنگ ءِ واستہ کوشست آنی سر ءَ ھم دل یکیمی دات۔
