اسلام آباد۔30مئی (اے پی پی): پارلیمانی کارانی وفاقی وزیر ڈاکٹر طارق فضل چوہدری ءَ گوشت کہ مئے دمگ مزنیں جنبش ءُ جوانیں دود ءُ ربیدگ آنی میراث ءَ چہ مالا مال انت، مارا وتی شہر آناں نوکیں لوٹ آنی رد ءَ منصوبگ بندی کنگی انت، چاگرد ءِ ہر تک ءُ پھنات ءَ را پائیڈار دیمروئی ءُ منصوبگ بندی ءِ واستہ وتی کرد ءَ پیلو کنگی انت۔ جمعہ ءِ روچ ءَ کامسیٹس یونیورسٹی اسلام آباد ءَ فلاحی ءِ میاں اوستمانی کانفرنس ءِ بنداتی دیوان ءَ گوں گشتانک دیان ءَ آئی ءَ گوشت کہ کانفرنس ءِ برجائی جوانیں کوشست اِنت، ساڑییں درستیں زانتکار آنی ھیال آیوکیں وھد ءِ منصوبگ بندی ءَ مئے واستہ رہشونی جوڑ بنت۔ آئی ءَ گوشت کہ جنوب ءَ شہری آبادی ءِ تناسب گیش بوھگ ءَ اِنت، ایشی ءَ ابید مارا چاگردی بدلی، ترندیں آبادی ءِ گیشی، نابرابری ءِ وڑیں جیڈھ آنی دیمپانی کنگ ءَ اِنت، ایشی ءِ واستہ مارا پائیڈار منصوبگ بندی ءِ ضلورت اِنت تانکہ ما وتی دود ءُ ربیدگی ورثہ ءِ رکھینگ ءَ بہ کن ایں ۔ مارا سمارٹ شہری آنی واستہ منصوبہ بندی ءِ گوما چاگردی بدلی آنی گوما دیم پہ دیم بوھگ ءِ واستہ گامگیج چست کنگی انت۔ آئی ءَ گوشت کہ ہارپا کہ یک شہرے مارا یات دنت کہ پائیڈار منصوبگ بندی ءُ گہتری ءِ راہ مدام مئے گوما بوتگ۔ اے درگت ءَ ما ماہرین ءِ مہارت ءِ لوٹ ءَ کنگ ءَ ایں ۔ ایشانی نیام ءَ بامردیں گپ ءُ تران ءُ ھمکاری مارا رھشونی کنت ءُ اے کانفرنس آیوکیں وھد ءِ منصوبہ بندی ءَ کمک کنت۔ نودربر آناں گوں تران کنان ءَ آئی ءَ گوشت کہ نودربر ملک ءِ آیوکیں باندات انت۔ ما وش بئیں کہ دگنیا ءَ مئے یک انچیں دیمے دیستگ کہ آئی ءِ سر ءَ ھمک پاکستانی ناز اِنت۔ آئی ءَ گوشت کہ پاکستان ءَ دگنیا ءِ تہ ءَ مزنیں نام زرتگ بلے ادا من ایوک ءَ ڈاکٹر عبدالقادیر خان ءِ نام ءَ گرگ ءَ آں آئی ءَ وتی بے دروریں کوشست ءُ محنت ءِ وسیلگ ءَ ملک ءَ را ھما عزت ءُ شرپ داتگ کہ ایشی ءِ سبب ءَ پاکستان سرجمیں دگنیا ءَ مزنیں ملک ءِ بستار ءَ زانگ بیت۔
