اسلام آباد۔30مئی (اے پی پی): راولپنڈی زالبولانی چیمبر آف کامرس ءِ ڈل ءَ صنعت ءُ تجارت ءِ بابت ءَ مزن وزیر ءِ ھاسیں کمکار ہارون اختر خان ءَ گوں گند ءُ نند کت۔ گند ءُ نند ءَ زالبول آنی اقتصادی بااختیار کنگ، چیمبر اسپیس ءِ پجاری، زالبول آنی واستہ ایکسپو ہب ءِ جوڑ کنگ ءُ ہنر ءِ دیمروئی ءِ ھوالگ ءَ ھاسیں جیڈھ آنی سر ءَ گپ ءُ تران کنگ بوت۔ ہارون اختر خان ءَ گپ ءُ تران ءِ ساھت ءَ گوشت کہ زالبول آنی واک ءُ توان دیئگ ءَ ابید پاکستان ءِ معیشت دیمروئی کت نہ کنت۔ آئی ءَ گوشت کہ مزن وزیر شہباز شریف ءِ سروکی ءَ حکومت راجی دیمروئی ءَ زالبول آناں سرگرمیں کرد دیگ ءِ واستہ جزمیگ انت، ایشانی دیمروئی ءَ مدام زالبول آناں ھوار کنگ ءَ را اولیت دیگ بوتگ۔ ھاسیں کمکار ءَ گوشت کہ وزارت ءِ صنعت ءُ پیداوار زالبول آنی ھنر آناں اپ گریڈ کنگ ءُ آھاں نوکیں ھنر آناں وانینگ ءِ عمل ءَ سرجمی ءَ کمک کنت ۔ آئی ءَ گوشت کہ سمڈا، توسیق ءُ پکووا ءِ وڑیں اڈارگ زالبول آنی ھنر ءَ را گیش کنگ ءَ سرگرمیں کرد پیلو کن اَنت۔ وومن چیمبر آف کامرس راولپنڈی ءَ آزات جموں ءُ کشمیر ءِ زالبول آنی واستہ ورکشاپ ءِ برجم ڈارگ بوتگ۔ نوکیں مرکز ءِ جوڑ کنگ ءِ جار ھم جنگ بوت، ایشی ءَ را ھاسیں کمکار ءَ ساڑات ءُ آئی ءَ وزارت ءِ سرجمیں کمک ءِ دل یکیمی دات۔ ہارون اختر خان ءَ سیادی ڈاروکیں اڈارگ آناں ہدایت کت کہ آ مہارت ءِ دیمروئی ءِ پروگرام آنی ھوالگ ءَ زالبولیں چیمبر آف کامرس ءَ گوں زوت گند ءُ نند بہ کن اَنت ءُ عملی گامگیج جوڑ بہ کن اَنت۔ آئی ءَ گوشت کہ آئی ءَ را وومن چیمبر آف کامرس ءِ گوما ہنر ءِ دیمروئی ءِ کار آنی دیمروئی ءِ بابت ءَ باقاعدہ رپوٹ دیگ بہ بیت۔ اے دیوان زالبول آنی اقتصادی بھر زوری ءُ وت واجہی ءِ ھاترا حکومت ءِ جزم ءِ درشان اِنت ءُ ایشی ءِ آسر ءَ زالبول آنی واستہ نوکیں راہ پچ بوھگ ءِ اُمیت اِنت۔
