اسلام آباد۔29مئی (اے پی پی): پاکستان ءَ رومانیہ ءِ سفیر اسٹوینیسکو ءَ راجی ھال رسانکی ادارگ ایسوسی ایٹڈ پریس آف پاکستان ءِ منیجنگ ڈائریکٹر محمد عاصم کھچی ءَ گوں پنچ شمبے ءِ روچ ءَ گند ءُ نند کت ءُ دوئیں ملک آنی نیام ءَ میڈیا ءِ شوبگ ءَ کمک ءَ را مھکم کنگ ءِ ھوالگ ءَ ھیال ءُ لیکہ درشان کتگ۔ سفیر ءَ اے پی پی ءُ رومانیہ ءِ حالجاہ ”ایجر پریس” ءِ نیام ءَ احوالکار آنی دیگ ءُ زورگ ءِ ارزشت ءِ سر ءَ زور پر دات تانکہ ھال آنی دیگ ءُ زورگ ءَ را دیمروئی دیگ بہ بیت۔ آئی ءَ انوگیں ڈیجیٹل دور ءَ نوکیں زانتکاری وسیلگ آناں جوانیں رنگ ءَ کارمرد کنگ ءِ ضلورت ءِ سر ءَ ھم زور پر دات۔ ایم ڈی “اے پی پی” ءُ رومانیہ ءِ سفیر ءَ شاھیگیں میڈیا ءِ صنعت ءَ کمک ءَ را گیش گیشی دیگ ءِ کشک آنی سر ءَ ھم تران کت۔ ایشاں ھال آنی مٹ ءُ بدلی ءِ تہ ءَ گیش ھمکاری ءُ کمک کنگ ءُ وت مہ وتی نپ ءِ واستہ یکجا کار کنگ ءِ جزم ءِ درشان کت۔ ڈاکٹر اسٹوینیسکو ءَ وانگ ءُ زانگ، ھیل کاری ءُ مردم آنی نیام ءَ رابطہ آنی پڑ ءَ کمک ءَ را گیش کنگ ءِ واستہ دلگوشی ءِ درشانی کت تانکہ دوئیں راج آنی نیام ءَ جوانیں سرپدی ءُ دیمروئی بہ بیت۔ منیجنگ ڈائریکٹر عاصم کھچی ءَ دوئیں ملک آنی نیام ءَ رسانکدر ءِ پڑ ءَ کمک ءُ ھال ءُ اھوال ءِ مٹ ءُ بدلی ءِ واستہ اے پی پی ءِ نیمگ ءَ چہ ھرچ وڑیں کمک ءِ دل یکیمی دات۔
