اسلام آباد۔ 29 مئی (اے پی پی) بنجائی وزیر داخلہ محسن نقوی پمز ہسپتال آ ہنا و داڑیل آتا سم کاری آن ٹھپی پولیس کانسٹیبل جعفر جہانگیر نا جان پڑسی ءِ کرے و اونا طب انا اَرفے۔ وزارت داخلہ نا کنڈآن پنچ شنبے نادے آ جاری بیان نا رداٹ وزیرداخلہ محسن نقوی ٹھپی کانسٹیبل جعفر جہانگیر نا بڑزکو حوصلہ نا ستاءِ کرے۔ اوٹھپی کانسٹیبل جعفر نا جان پڑسی ءِ کرے، اونا طب انا اَرفے و پورو دراخ جوڑی کن نیک است خواہی نا درشانی ءِ کرے۔ وزیرداخلہ محسن نقوی ٹھپی کانسٹیبل جعفر نا گچین درمان کن پارت تس و پارے کہ ٹھپی پولیس کانسٹیبل جعفر نا درمان اٹی ہچ ءُ کسر اس ہلنگپ۔ محسن نقوی داوخت آ گپ وتران کرساپارے کہ نن غٹ نیتون تفوک اُن و نا زوت دراخ جوڑی کن دعاکننگ اُن۔ وزیرداخلہ پارے کہ اسلام آباد پولیس نا گلزادہ غاک داڑیل آتا بہادری اٹ مقابلہ ءِ کریر۔ محسن نقوی پارے کہ داڑیل آتا سم کاری آن شہید اے ایس آئی سدھیر احمد عباسی نا قربانی ءِ سلام پیش کینہ۔ اوپارے کہ شہید اے ایس آئی سدھیر عباسی اسہ پروفیشنل و نڈر ءُ آفیسر اس ئس۔ شہید اے ایس آئی سدھیر عباسی نا خاہوت نا ہروڑاٹ خیال ءِ تخنگک۔ وزیرمملکت داخلہ طلال چوہدری ، آئی جی اسلام آباد پولیس علی ناصر رضوی ، چیف کمشنر اسلام آباد محمد علی رندھاوا، ڈپٹی کمشنر اسلام آباد عرفان نواز میمن و بڑزکو پولیس آفیسر آک ہم داوخت آ ساڑی ئسر۔ یات سلے کہ تدوک آ نن داڑیل آتا سم کاری آن اے ایس آئی سدھیر عباسی شہید و کانسٹیبل جعفر جہانگیر ٹھپی مسوسس۔
