اقوام متحدہ۔ 29 مئی (اے پی پی) پاکستان پارینے کہ غزہ غان بڑزمروک آ چیہانٹ آتیا چُپ مننگ مفک، و دنیا دابابت گام گیج آتیٹی اسہ دے انا ہم تاخیر ءِ سگنگ کپک۔ اقوام متحدہ ٹی پاکستان نا آخبتی مندوب عاصم افتخار احمد داہیت ءِ نوشتہ کرساپارے کہ اقوام متحدہ نا جنرل اسمبلی جون اٹی اسرائیل فلسطین تنازعہ نا اِرا ریاستی ایسری آ اسہ کانفرنس اس اڈ ایتک، سلامتی کونسل آ زور شاغانے کہ او اسرائیل نا کنڈآن فلسطینی تا کشت وخون، اوفتے معذور کننگ و اوفتے قحط اٹ اختہ کننگ آ خاموش تماشائی مننگ مفک۔ سلامتی کونسل اٹی فلسطین نا حالیت آتیا شرہ ٹی پاکستان نا مندوب پارے کہ تاریخ فلسطین نا بابت ننے ننا زمواری تا عدم عدائیگی آ اسُل بشخپک۔ پاکستانی مندوب پارے کہ غزہ نا بابت دمدستی خواست آک بھاز پیدوار ءُ ہرافتے ٹی جنگ بندی، یرغمالی تا یلہ کننگ، انسانی بنداوتیا کارروائی و کودک شاری تا رکھ اوارءِ ہرادے ہرحال اٹ ممکن کننگے۔ اوپارے کہ پاکستان کونسل نا غٹ باسک آتیان خواست کیک کہ او یکجا مرسا اسہ قرارداد اسے نا کمک اٹ دمدستی وڑاٹ فلسطین نا ویل انا انصاف اٹ و دیرپا ایسری کن جون نا کانفرنس کن سازگار چاگڑد اس ودی کننگ اٹ کمک کیر۔ اوپارے کہ فلسطینی الس تون خوفناک حداسکان بھاز خراب مسنے و داغٹ انا زموار آتا استثنیٰ نا وخت چٹانے۔ اوپارے کہ غزہ نا ساڑی حالیت آتا رداٹ گڑتی نا لو ز گنج اس اف و دابابت کونسل ءِ سہی سمت اٹ کاریم کننگ نا گرج ءِ ہراٹی پیدوار کننگے کہ اخلاقی و کانودی وڑاٹ اقوام متحدہ نا چارٹرنا رداٹ غزہ ٹی پین اخس ظلم انا ارتکاب مرے اوکان پد سلامتی کونسل داڑآ کارروائی اس کیک۔ اوپارے کہ داسہ غزہ ٹی نسل کشی ءِ توننگ نا بابت دمدستی گام گیج کننگ نا وخت بسنے ہراٹی تاخیر ناقابل برداشت ءِ۔
