لاچین۔29مئی (اے پی پی): مزن وزیر محمد شہباز شریف ءَ پاکستان ءُ آذربائیجان ءِ نیام ءَ جتا جتائیں شوبگ آنی تہ ءَ سیادی ءَ را گیش مھکم کنگ ءِ جزم ءِ پد ءَ گوشت کہ آ آذربائیجان ءِ گوما تجارت، دیمپان، وانگ ءُ زانگ، جان سلامتی ءِ وڑیں جتا جتائیں شوبگ آنی تہ ءَ وت مہ وتی کمک ءَ را گیش پراھی کن اَنت۔ آذربائیجان پاکستان ءَ 2 ارب ڈالر سرمایہ کاری کنت۔ آئی ءَ اے گپ پنچ شمبے ءِ روچ ءَ ادا آذربائیجان ءِ تر ءُ تاب ءِ سرجم کنگ ءَ پد تاجکستان ءِ روگ ءَ پیسر لاچین بالی پٹ ءَ میڈیا ءَ گوں تران کنان ءَ کت۔ مزن وزیر ءَ پاکستان ءُ آذربائیجان ءِ واستہ 28 مئی ءِ ارزشت ءِ سر ءَ زور پر دیئگ ءَ گوشت کہ اے ھاسیں روچ اِنت کہ 28 مئی 1998 ءَ پاکستان ءَ اے آئی ایم تراک کت ءُ اے آئی ایم پاور ءِ ملک جوڑ بوت۔ براتیں ملک آذربائیجان ءِ آجوئی ءِ روچ ھم اِنت۔ آئی ءَ گوشت کہ صدر الہام علیف ءِ سروکی ءَ آذربائیجان ءَ سرجمی ءَ بدلی اتکگ ءُ آئی ءَ مزنیں پیشرفت کتگ۔ آئی ءَ گوشت کہ تر ءُ تاب ءِ ساھت ءَ مئے تجارت، سرمایہ کاری، کاروباری شوبگ ءَ کمک ءِ ھوالگ ءَ ھیال ریچی کنگ بوت۔ آئی ءَ گوشت کہ صدر الہام علیف ءَ پاکستان ءَ دو ارب ڈالر ءِ سرمایہ کاری ءِ واستہ وتی جزم ءِ یک رند ءَ گوشت کہ ما اے سرمایہ کاری ءَ را یکجائی نپ آنی واستہ کنگ ءَ تیار آں۔ مزن وزیر ءَ گوشت کہ ما اے دگہ شوبگ آنی تہ ءَ تجارت، دیمپان، وانگ ءُ زانگ ءُ جان سلامتی ءِ تہ ءَ وت مہ وتی کمک ءَ را گیش پراھی کناں۔ ایشی ءَ پد آذربائیجان ءِ سئے روچی تر ءُ تاب ءِ سرجم کنگ ءَ پد مزن وزیر محمد شہباز شریف تاجکستان ءِ بنجاھی شہر دوشنبے ءَ رھادگ بوت۔ آئی ءَ را آذربائیجان ءِ نائب وزیر ءِ درئی کار النور ممدوف، آذربائیجان ءَ پاکستان ءِ سفیر قاسم محی الدین ءُ دگہ سفارتی کارندہ آں لچنا ءِ بنو میاں اوستمانی بالی پٹ ءَ یلہ داتگ۔ آذربائیجان ءِ تر ءُ تاب ءِ وھد ءَ مزن وزیر ءَ آذربائیجان ءِ صدر الہام علیف ءَ گوں گند ءُ نند کتگ۔ آئی ءَ پاکستان ءُ ترکی ءُ آذربائیجان ءِ آزاد بیپار ءِ سروک دیوان ءَ بہر زرتگ۔ آئی ءَ آذربائیجان ءِ آجوئی ءِ روچ ءِ مراگش ءَ ھم بھر زرتگ۔ مزن وزیر دوشنبے ءَ برجم دارگ بوؤکیں گلیشیر آنی رکھینگ ءِ ھوالگ ءَ میاں اوستمانی کانفرنس ءَ بھر زوری کنت۔
