اسلام آباد۔ 29 مئی (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ اقوام متحدہ نا امن فوج انا دستہ جہانی امن و سلامتی ءِ برقرار تخنگ کن دنیا نا چندی بشخ آتیٹی لگن و حوصلہ اٹ خذمت سرتننگ ءِ، پاکستان اقوام متحدہ نا امن دستہ غاتا جہانی دے انا وخت آ اقوام متحدہ نا امن دستہ غاتا لگن، حوصلہ و خذمت ءِ امنا کننگ کن جہانی برادری تون اوار ءِ۔ نائب وزیراعظم و وزیرخارجہ داخیال آتا درشانی ءِ چارشنبے نادے آ اقوام متحدہ نا امن دستہ غاتا جہانی دے انا وخت آ تینا کلہو اٹی کرے۔ اوپارے کہ دادے اقوام متحدہ نا امن فوج اٹی اوار بھلو کچ اسے ٹی کارندہ غاتا کنڈآن تینا ڈیوٹی ٹی تروک آ جون تا قربانی ءِ خراج عقیدت پیش کننگ کن ہم اسہ اہم یات دہانی اسے ہرافتے ٹی پاکستان نا 181 بہادر امن فوجی ہم اوار ءُ۔ نائب وزیراعظم پارے کہ سال آتیٹی پاکستان اقوام متحدہ نا امن مشنز کن فوجی کمک کروک آ اسہ سرکڑدہ ملک اس رہینگانے، امن فوج اٹی اِرالکھ 35 ہزار آن زیات پاکستانی نرینہ و نیاڑی کارندہ دنیا نا کیہی بشخ آتیٹی امتیاز تون خذمت سرتس و تننگ ءِ۔ اوپارے کہ پاکستان اقوام متحدہ نا متکن انگا امن مشن تیان اسٹ اقوام متحدہ نا ملٹری آبزرور گروپ ان انڈیا اینڈ پاکستان (یواین ایم او جی آئی پی) نا مہماندار ہم ارے۔ نائب وزیراعظم سینیٹر محمد اسحاق ڈار پارے کہ ڈیہہ اٹی ساڑی آ پیش رفت اقوام متحدہ نا سلامتی کونسل نا تعلقدار قرارداد و کشمیری الس نا است خواہی تا رداٹ جموں و کشمیر نا جھیڑہ نا انصاف اٹ ایسری تون اوار اوار (یواین ایم او جی آئی پی) نا ساڑی گری و کڑد ءِ پین سوگو کننگ نا گرج ءِ سوگوی ایتک۔ اوپارے کہ اسہ ہندن ءُ وخت اسے ٹی ہراتم دنیا ءِ کثیر جہتی خطرہ غاتا مون تروک ءِ، اقوام متحدہ نا امن فوج جہانی امن و سلامتی ءِ برقرارتخنگ کن غٹ آن زیات پت انا قابل و موثر ءِ۔ اوپارے کہ جہانی برادری نا کنڈآن دادے انا یات انا وخت آ اقوام متحدہ نا امن فوج ءِ ساڑی و آخبت نا چیلنج بشمول تکنیکی جدت طرازی و علاقائی شریداری ءِ سوگو کننگ، تون مون تننگ کن سیاسی عزم انا پوسکنی نا گرج ءِ۔ نائب وزیراعظم پارے کہ پاکستان و جمہوریہ کوریا 15 آن 16 اپریل آ اسلام آباد اٹی اقوام متحدہ نا امن مشن نا وزارتی تیاری نا مسٹ میکو دیوان نا ’’رکھ و زیات گچین امن قائم کننگ نا کنڈآ: ٹیکنالوجی نا کاریم اٹ اتنگ و مربوط نقطہ نظر‘‘ نا سرحال نا رداٹ اسیجائی مہمانداری ءِ کریر۔ دیوان نا نتیجہ غاک دا مسخت نا دوئی کننگ نا گام گیج آتا رفتار ءِ ترند کننگ اٹ کمکار مسنو۔ اوپارے کہ پاکستان اسہ پرامن، سوگو و شونہال دنیا کن اقوام متحدہ نا امن مشن کن تینا سوگو عزم ءِ برقرارتخنگ و تخک۔
