اسلام آباد۔ 29 مئی (اے پی پی) وزیراعظم محمد شہباز شریف اقوام متحدہ نا امن مشنز ءِ پین سوگو کننگ نا کوشست آتیٹی پاکستان نا عزم و مخ تفی نا درشانی ءِ کرساپارینے کہ سویلی ایشیاٹی ساڑی آ واقعہ غاک اقوام متحدہ نا سلامتی کونسل نا قرارداد و کشمیری الس نا است خواہی تارداٹ کشمیر نا ویل انا انصاف اٹ ایسری ءِ پک کننگ و اقوام متحدہ نا پاکستان و بھارت اٹی ملٹری آبزرور گروپ نا کڑد و ساڑی گری ءِ سوگو کننگ نا گرج آتے تالان کرینو۔ وزیراعظم آفس نا میڈیا ونگ انا کنڈآن جاری بیان نا رداٹ اقوام متحدہ نا امن دستہ غاتا جہانی دے آ تینا کلہو اٹی وزیراعظم پارے کہ اینو نن جہانی برادری تون اواری اٹ اقوام متحدہ نا امن دستہ غاتا جہانی دے ءِ اڈتننگ اُن۔ دادے نئے بیرہ اقوام متحدہ نا امن دستہ غاتا کنڈآن جہانی امن و سلامتی نا دوئی کننگ کن تروک آ لاتعداد قربانی تا اسہ یات دہانی اسے بلکن اسہ پرامن، سوگو شونہال دنیا کن دا امن دستہ غاتا اہم کڑد انا اعتراف ءِ۔ اوپارے کہ اقوام متحدہ نا امن مشن نا ہفت دہائی تیا تالان تاریخ اٹی 2 لکھ 35 ہزار آن زیات پاکستانی امن دستہ غاک مچ آ دنیا ٹی اقوام متحدہ نا 48 مشنز اٹی امتیازی خذمت سرتسنو۔ 181 پاکستانی امن فوجیک جہانی امن و سلامتی نا دوئی کننگ اٹ تینا جون تا بے مٹ قربانی ءِ تسنو۔ وزیراعظم پارے کہ دادے اقوام متحدہ نا امن فوج ءِ مون تروک بھاز انگا چیلنج دُن کہ ودوک آ اسہ کنڈی پالیسی ، مالی پابندی، اقوام متحدہ نا امن دستہ غاتا رکھ و سلامتی کن ودوک آ خطرہ ، غلط معلومداری نا بنداو آ اقوام متحدہ نا امن کارروائی تے شست کننگ، و پوسکن و مون آ بروک ٹیکنالوجی تا غیرمستحکم اثرات پین پین نا جاچ ءِ ہلنگ نا جوان ءُ موقع اسے۔ وزیراعظم پارے کہ اینو نادے، ای جہانی برادری آن خواست کیوہ کہ او جہانی امن و سلامتی ءِ برقرارتخنگ کن اقوام متحدہ نا سرسہب پالیسی تیکن تینا وابستگی نا درشانی ءِ کے، و اقوام متحدہ نا امن فوج ءِ داترندی اٹ مون آ بروک چیلنج آتا رداٹ شاغنگ نا کوشست آتے اِراہنداخہ کننگے۔ وزیراعظم یات کرفے کہ دا چیلنج آتے ایسر کننگ نا کوشست آتیٹی پاکستان جمہوریہ کوریاتون اواری اٹ 15-16اپریل 2025آ اسلام آباد اٹی اقوام متحدہ نا امن مشن نا وزارتی دیوان نا اسیجائی مہمانداری ءِ کرے ہرانا سرحال’’اسہ رکھ و زیات گچین امن نا کنڈآ: ٹیکنالوجی نا کاریم اٹ اتنگ و مربوط نقطہ نظر‘‘ ئس۔ اوپارے کہ پاکستان ، بھارت و پاکستان اٹی اقوام متحدہ نا فوجی مبصر گروپ (UNMOGIP)نا مہمانداری ءِ ہم کیک، ہراکہ اقوام متحدہ نا غٹ آن متکن امن مشن تیان اسٹ ءِ، ہرادے جموں وکشمیر نا اقوام متحدہ نا امنا مروک متنازعہ علاقہ ٹی لائن آف کنٹرول تون جنگ بندی نا چاروکی نا کاریم ءِ تننگانے۔ سویلی ایشیاٹی ساڑی آ واقعہ غاک اقوام متحدہ نا سلامتی کونسل نا قرارداد و کشمیری الس نا است خواہی تا رداٹ جموں وکشمیر تنازعہ نا انصاف اٹ ایسری ءِ پک کننگ و UNMOGIPنا کڑد و ساڑی گری ءِ سوگو کننگ نا گرج ءِ تالان کرینے۔ اسہ فوجی کمک کروک آ سرکڑدہ ملک و اقوام متحدہ نا سلامتی کونسل نا بے آخبتی باسک انا وڑاٹ، ای اینو اقوام متحدہ نا امن مشن تے پین سوگو کننگ کن غٹ کوشست آتیٹی پاکستان نا عزم و مخ تفی نا درشانی ءِ کیوہ۔
