اسلام آباد۔28مئی (اے پی پی):ریلوے ءِ وفاقی وزیر محمد حنیف عباسی ءَ یوم تکبیر ءِ موہ ءَ پاکستان ءِ اُلس ءَ را دل ءِ جہلانکی ءَ چہ سلام پیش کنان ءَ گوشت کہ مرچی پاکستان ءِ ایٹمی طاقت آنی صف آنی تہ ءَ راجدپتری ھوار بوھگ ءِ 27 سال سرجم اِنت۔ چار شمبے ءِ روچ ءَ یوم تکبیر ءِ موہ ءَ وتی بیان ءِ تہ ءَ وفاقی وزیر ءَ پیسریگیں مزن وزیر محمد نواز شریف ءِ دلیری ءِ سروکی ءَ را شگر ءُ منت درشان کت۔ آئی ءَ گوشت کہ 28 مئی ءَ پاکستان نواز شریف ءِ دلیری ءِ سروکی ءَ ھندوستان ءِ پنچ تراک آنی پسو ءَ شش ایٹمی آزمائش کنان ءَ کامیابی ءَ گوں اولی مسلمان ایٹمی طاقت جوڑ بوت۔ آئی ءَ اے گپ ءِ سر ءَ زور پر دات کہ اے چکاس چاغی بلوچستان ءِ کوہ آنی تہ ءَ بے دروریں اقتصادی دباؤ، میاں اوستمانی پابندیاں، دھمکی ءُ لالچ ءِ پیشکش آنی باوجود کنگ بوتگ اَنت کہ پاکستان ءَ را پسو دیگ ءَ چہ رکّینگ بہ بیت۔ آئی ءَ گیش کرتگ کہ اے ماہ مارا بھارت ءِ نیمگ ءَ ایر کنگ بوتگیں ناانصافیں جنگ ءِ ھم یات ءَ دنت کہ ایشی ءِ تہ ءَ سرجمیں راج یک رندے پدا وتی سلاہ بندیں اُرد ءِ گوما شانہ پہ شانہ اوشتاتگ۔ مئے فورسز ءِ بہادری ءَ گوں ہندوستان ءَ شکست ءِ دیم ءَ دارگی بوتگ ءُ اللہ تعالیٰ ءِ فضل ءُ کرم ءَ پاکستان سوبمند بوتگ۔ آئی ءَ اے گپ ءِ سر ءَ زور پر دات کہ دراھیں پاکستانی وتی سلاہ بندیں اُرد ءُ ایمنی ءِ ادارگ آنی سر ءَ ناز ءُ شان ءِ احساس بہ کن اَنت۔ آئی ءَ گوشت کہ راج ھما درستیں مردماں سلام انت کہ آھاں پاکستان ءِ دمپانی ءَ را بے شکست جوڑ کنگ ءَ راجدپتری کرد پیلو کتگ۔ محمد حنیف عباسی ءَ ھم راجی یکوئی ءُ جزم ءِ پدا زور پر دات ءُ گوشت کہ پاکستان ءِ اسٹریٹجک صلاحیت ناقابل شکست اِنت۔
