اسلام آباد۔28مئی (اے پی پی):منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ وھد اتکگ کہ ما یک راجے ءِ بستار ءَ یکجاھ بہ بئیں تانکہ یک مھکمیں پاکستان ءَ را اقتصادی رد ءَ ناقابل شکست جوڑ بہ کن ایں، ایٹمی تراک ءِ روچ ءَ مارا اقتصادی تراک ءِ کنگ ءِ وتی جزم ءِ پدا پدر کنگ لوٹ ایت۔ یوم تکبیر ءِ موہ ءَ منصوبہ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ راج ءَ را وتی ھاسیں پیغام ءِ تہ ءَ گوشت کہ 28 مئی 1998 ءَ راجدپتری روچ بوتگ کہ پاکستان ءَمحمد نواز شریف ءِ سروکی ءَ یک ایٹمی ارش ءِ دیم داتگ دژمن کہ ما یک وت واجہیں راجے کہ وتی دمپانی ءُ یکوئی ءِ سرا ہچبر سمجھوتہ نہ کنت۔ اے کارنامہ ایوک ءَ یک سرکارے ءِ آسر نہ بوتگ بلکیں سرجمیں راج ءِ ایمان ، یکوئی ءُ دژمن ءِ ھلاپ ءَ سیسہ ءِ دیوال جوڑ بوھگ ءِ جزم ءِ آسر بوتگ کہ ایشی ءَ پاکستان ءَ را دگنیا ءِ ھپتمی ایٹمی طاقت جوڑ کتگ۔ آئی ءَ گوشت کہ مرچی 2025ءَ یک رندے پدا پاکستان مسلم لیگ ءِ حکومت مزن وزیر محمد شہباز شریف ءِ سروکی ءَ ملک ءِ واستہ دیمروئی ءُ وشھالی ءِ سفر ءَ بندات کنگ ءَ انت۔ مسلم لیگ (ن) ءِ سروک نواز شریف ءِ سروکی ءَ حکومت ءَ 2015 ءَ سکیں سیاسی کش ءُ چیل ءِ چاگرد ءَ سرجمیں سیاسی گل ءُ سروک وتی بھروسہ ءِ تہ ءَ زرتگ ءُ سی پیک ءِ سر ءَ تپاکی جوڑ کتگ ءُ پاکستان ءَ را اقتصادی دیمروئی ءِ راہ ءَ ایر کتگ۔ مرچی سی پیک سرجمیں راج ءُ چاریں استانانی دیمروئی ءِ استعارہ جوڑ بوتگ۔ وفاقی وزیر ءَ گوشت کہ اتفاق ءَ مئی 1999 ءَ ایٹمی طاقت جوڑ بوھگ ءَ چہ 26سال ءَ پد ھمے مئی ءِ ماہ ءَ بھارت ءِ زوراکی ءِ سر ءَ لائکیں پسو دیگ ءَ پاکستان ءَ دگنیا ءَ را اے پیغام دیم دات کہ ما نہ ایوک ءَ دمپانی ءِ تہ ءَ مھکم ایں بلکیں سیاسی سروکی ءُ راجی ادارگ ھم ملک ءِ رکھینگ ءِ ھاترا سرجمی ءَ پابند اَنت۔ ما دژمن ءِ بالی اُرد ءِ دیم ءَ کشگ ءَ اے گپ ثابت کت کہ پاکستان امن ءِ واھشت ءَ داریت بلے دمپانی ءِ تہ ءَ لاپرواہ نہ اِنت۔ مرچی خدا ءِ شکر انت کہ پاکستان دمپانیی شوبگ ءَ نوکیں ٹیکنالوجی ءُ سلاہ آنی گوما لیسیں مزنیں دمپانیی طاقت ءِ رنگ ءَ سہرا بوتگ ءُ جھان ءِ افق ءِ سر ءَ یک ذمہ واریں طاقت ءِ رنگ ءَ سہرا بوتگ۔ منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ نوں وھد اتکگ کہ ما یک راج ءِ رنگ ءَ یکجا بہ بئیں تانکہ دمپانی ءِ تہ ءَ مھکمیں پاکستان ءَ را معاشی رد ءَ ناقابل شکست جوڑ بہ کن ایں ۔ مرچی ایٹمی تراک ءِ روچ ءَ مارا اقتصادی تراک ءِ جوڑ کنگ ءِ وتی عزم ءِ پدا پدر کنگی اِنت۔ “اُڑان پاکستان” مئے راجی ویژن اِنت ایشی ءِ وسیلگ ءَ ما ملک ءَ را دیمروئی کتگیں، وت واجہ ءُ نوکیں معیشت ءِ تہ ءَ بدل کنگ لوٹ ایں۔ آئی ءَ گوشت کہ اودان پاکستان ءِ سوبمندی ءِ واستہ المی اِنت کہ ما سیاسی بے رھبندی ءِ ھمک پندل ءَ را ناکام بہ کن ایں، پالیشی آنی برجائی ءَ را دل یکیمی بہ کن ایں ءُ ھمک شوبگ ءَ اصلاحات ءُ وت مہ وتی احتساب ءَ را دیم ءَ برگ بہ کن ایں ۔ مارا گوں تپاکی، رھشونی ءِ سر ءَ بھروسہ ءُ دیمروئی ءِ سر ءَ ایمان ءَ دیم ءَ روگی اِنت۔
