چینی ٹیکنالوجی ءَ مغرب ءَ را چہ پیسر کتگ، چین ءِ جنوبی ایشیا ءِ بہر بوھگ امن ءُ ایمنی ءِ ھاتر ءَ جوانیں ھبر  اِت، سینیٹر مشاہد حسین سید

بیجنگ ۔28مئی  (اے پی پی):سینیٹر مشاہد حسین سید ءَ گوشت کہ چینی ٹیکنالوجی ءَ مغرب ءَ را چہ دیم ءَ شتگ، چین ءِ جنوبی ایشیا ءِ بھر بوھگ امن ءُ ایمنی ءِ واستہ جوانیں شگون انت۔ بیجنگ ءَ سینیٹر مشاہد حسین سید ءِ سروکی ءَ ’’بدل بوھگ ءِ گلوبل لینڈ اسکیپ ءُ ایشیا‘‘ بنگپ ءِ سر ءَ گپ ءُ تران ءِ برجم دارگ بوت۔ اے مزنیں کچ ءِ دیوان ءَ 29 ملک آنی 250 سیاسی گل آنی سروک ءُ نمائندگ آنی تہ ءَ بھر زوری کنگ بوتگ کہ ایشی ءِ میزبانی چین ءِ کمیونسٹ پارٹی ءِ میاں اوستمانی محکمہ ءَ کتگ۔ اے شرپ سینیٹر مشاہد حسین سید ءَ را ایشیائی سیاسی گلانی میاں اوستمانی کانفرنس ءِ شریک چیئرمین ءِ بستار ءَ دیگ بوتگ۔ آئی ءِ سروکی ءَ اے گپ ءُ تران ءَ آئی ڈی سی پی سی ءِ وزیر لیو جیانچاؤ، تھائی لینڈ ءِ پیسریگیں اسپیکر بوکین بالاکولا ءُ منگولیا ءِ پیسریگیں درئی کارانی وزیر دامدین سوگٹیباتار ءَ بہر زرتگ۔ بیجنگ ءَ چہ رستگیں بیان ءِ رد ءَ سینیٹر مشاہد حسین سید ءَ دمپانی ءَ ھوار ھاسیں پڑ آنی تہ ءَ مغربی ٹیکنالوجی ءِ سر ءَ چین ءِ ٹیکنالوجی ءِ دیمروئی ءَ را وش اتک کتگ ءُ گوشت کہ چین جنوبی ایشیا ءِ بھر اِنت ءُ امن ءُ ایمنی ءِ واستہ جوانیں کرد پیلو کنگ ءَ اِنت۔ وتی بنداتی گشتانک ءِ تہ ءَ سینیٹر مشاہد حسین سید ءَ گوشت کہ گلوبل پاور ءِ توازن مغرب ءَ چہ مشرق ءِ نیمگ ءَ شُتگ ءُ ایشیائی صدی ءِ بندات ءَ گوں مشرق ءِ دیمروئی ءِ گندگ ءَ اِنت۔ آئی ءَ چین ءِ کوشست آناں ساڑات کہ آ وتی کرد ءَ را اقتصادی دیمروئی ءِ وسیلگ ءَ پیلو کنت ءُ نہ کہ کجام ھم ملک ءِ سر ءَ فتح، نوآبادیاتی، زوراکی یا اُرش ءَ کنت۔ آئی ءَ گیش گوشت کہ چین جنوبی ایشیا ءِ بھر اِنت ءُ مئے دمگ ءَ امن ءُ ایمنی ءِ ضامن ھم اِنت۔ مشاہد حسین ءَ سائنس ءُ ٹیکنالوجی ءِ پڑ ءَ چین ءِ دیمروئی ءِ توسیپ کتگ ءُ ’’دی اکانومسٹ‘‘ ءِ نوکیں کور ءِ حوالہ ءَ گشتگ کہ چین ءَ را ’’سائنسی سپر پاور‘‘ ءِ جار جنگ بوتگ۔ آئی ءَ گیش کرتگ کہ جے ون سی جنگی جہاز بہ بیت، ڈیپ سیک اے آئی بہ بیت یا الیکٹرک گاڑی چین ءَ ٹیکنالوجی ءِ پڑ ءَ مغرب ءَ چہ پیسر بوتگ۔ ’چینی ماڈل‘ ءِ بابت ءَ یک جُست ءِ پسو ءَ آئی ڈی سی پی سی ءِ وزیر لیو جیانچاؤ ءَ گوشت کہ چین اگاں چہ وتی سیاسی نظریات آناں برآمد کنگ ءِ سر ءَ باور نہ کنت بلے گریبی ءِ ھلاسی ءِ تہ ءَ چینی تجربگ دیمروئی کنوکیں ملک آنی واستہ کارآمد بوت کن اَنت۔ آئی ءَ گیش کرتگ کہ چین ھم جنوبی ایشیا ءِ بھر اِنت ءُ بازیں ملک آئی ءِ ھمساھگ اَنت۔ آئی ءَ گوشت کہ چین ءِ سیمسر 14 ملک آنی گوما است انت بلے ایوک ءَ بھارت ءِ گوما سیم سر ءِ جیڈھ است انت ءُ چین ءِ ھیال انت کہ اے جیڈھ دوئیں ملک آنی سیادی آنی یکیں پیمائش مہ بیت ءُ اے جیڈھ ءَ را ایمنی ءِ گوما گیش ءُ گیوار کنگ بہ بیت۔ کانفرنس ءِ تہا پاکستان ءِ نمائندگی ءَ پیسریگیں چیئرمین سینیٹر نیار حسین بخاری، سینیٹر انوشا رحمان، چین ءِ تہا پاکستان ءِ سفیر خلیل ہاشمی، بازیں کاروباری مردم ءُ تھنک ٹینک ءِ نمائندگاں کتگ ات۔ سینیٹر مشاہد حسین سید ءِ گوما جتاھیں گند ءُ نند ءَ وزیر لیو جیانچاؤ ءَ پاکستان ءُ چین ءِ نیام ءَ مزن تک ءِ تبادلہ ءُ سوبمندیں تر ءُ تاب ءِ حوالہ دات ایشی ءِ تہ ءَ جون 2024 ءَ پاکستان ءِ تر ءُ تاب ءُ بیجنگ ءِ تر ءُ تاب ءِ وھد ءَ نائب مزن وزیر ءُ درئی کارانی وزیر اسحاق ڈار ءِ گوما گوستگیں گند ءُ نند ھوار انت۔ آئی ءَ اے گپ ءِ سر ءَ زور پر دات کہ چینی کمیونسٹ پارٹی پاکستان ءِ توامیں سیاسی گل آنی گوما دوستی ءِ سیادی ءَ را گیش مھکم کنت ۔ زانگ بہ بیت آئی ڈی سی پی سی ءِ اے کانفرنس ءِ واستہ پاکستان ءُ ملائیشیا ءِ مزن وزیر آں ھاسیں مبارکی کلوہ دیم داتگ۔