کوئٹہ۔ 30 اپریل (اے پی پی) وزیراعلیٰ بلوچستان میر سرفرازبگٹی پارینے کہ تاریخ آن لاعملی ساڑی آ وخت انا ویل آتے سمجھنگ و آخبت نا کسر ءِ متعین کننگ اٹ اڑاند نا سوب جوڑمریک، بلوچستان نا ساڑی حالیت آتے سمجھنگ کن مستین و تاریخی رداٹ آگاہی المی ءِ۔ داخیال آتا درشانی ءِ او کوئٹہ ٹی پانزدہ می نیشنل ورکشاپ بلوچستان نا بشخ ہلوک آتیان تران کرساکرے۔ وزیراعلیٰ پارے کہ بلوچستان نا بابت ہرا تاثر ملک انا ایلو بشخ آتیٹی ءِ اوٹی و ڈغاری حقائق آتیٹی پیدوار پرخ ءِ ہرادے ہرپاکستانی ءِ چاہوئی مریک کہ تاریخی حقائق آتے بے وڑ پیش کننگ نا جاگہ غا اوفتا سُچائی ءِ پٹنگ اہم ءِ، مستین اٹ قلات نا محدود آپریشن ءِ مچ آ بلوچستان اٹی کارروائی نا تاثر تننگا حالانکہ داوڑالوکہ دُن کہ رحیم یارخان یالیاری نا محدود آپریشن آتے وخت اس مچ آ پنجاب یاکراچی نا آپریشن پاننگ مفک، اسُل ہمووڑ قلات نا مخصوص علاقہ ٹی محدود کہول انا کارروائی ءِ مچ آ بلوچستان نا آپریشن پاننگ مفک۔ میر سرفراز بگٹی پارے کہ غیرمتوازن شونداری بیرہ بلوچستان آخا بلکن پاکستان و دنیا نا کیہی ملک آتا ویل ءِ، بلوچستان اٹی ایمرجنسی نا اصل سوب غیرمتوازن شونداری اف بلکن اونا ماسک پین جاگہ سے آٹی ءُ، بیڈ گورننس یا شونداری نا کمتی آ حکومت آن غاو مننگ کیک ولے دابنداو آ ریاست آن ناراضگی یا جتائی گری نا ہچ ءُ جواز اس اف۔ میر سرفراز بگٹی آئین نا آرٹیکل 5 نا حوالہ ءِ ترساپارے کہ ریاست تون غیرمشروط وفاداری ہر شاری نا آئینی و اخلاقی فرض ءِ، دہشت گرد ریاست ءِ کیک آنبار کاٹنگ خوارہ و ورناتے سوشل میڈیا، پروپیگنڈا و مصنوعی ذہانت نا کمک اٹ ریفنگ ءُ، دشمن واکدار آک تعلیمی ادارہ غاتا طالب علم آتا ذہن تیٹی زیار تالان کننگ ءُ، ہرافتا توننگ ننا غٹ انا زمواری ءِ، وزیراعلیٰ بلوچستان زور شاغا کہ دہشت گردی نا برخلاف جنگ بیرہ ریاست یا فوج انا آخا بلکن ہربندغ نا جنگ ءِ، چائے دہشت گردی مذہب نا بنداو آمرے یا زبان نا بنداوآ، او مذمت نا قابل ءِ، بلوچ و پنجابی تا نیام اٹ خار ودی کروک آک اصل اٹ پاکستانی تا دتر ءِ وہیفنگ ءُ، ننے کنفیوژن آن کشسا ڈغاری حقائق و پیدوار سوچ اتون دہشت گردی تون مون تروئی مریک، سُچائی و دیانت آ تالان بیانیہ ملک ءِ شونداری نا کنڈآدننگ کیک۔
