تہران ۔ 23 جولائی (اے پی پی ) ایران نا وزیر دفاع بریگیڈیئر جنرل حسین دھقان تون عراقی ہم منصب بریگیڈئیر جنرل عرفان الحیالی اوڑدہی کرے ۔ ہراٹی دفاع تون اوار ایلو تین پہ تینی معاملہ غاتیا خیال آتا درشانی ئِ کننگا۔ ارنا نیوز نارداٹ دا اوڑدہی تہران اٹی کننگا ۔ عراقی ہم منصب ہیت و گپ کرسا وزیر دفاع بریگیڈئیر جنرل حسین دھقان پارے کہ ایران عراق نا حکومت و الس نا مخ تفی ئِ برجا تخک۔ اوپارے کہ ایران ،عراق نا امن وسوگوی و اودے اسہ طاقت ور ئُ ملک اسے ٹی بدل کننگ کن، سیاسی ،اقتصادی و فوجی ہر لحاظ اٹ کمک کیک۔اوپارے کہ ایران ، عراق نا ڈغاری سالمیت نا رکھ آزو رشاغک انتئے کہ عراق نا یکجہتی ہی دا ملک اٹی آباد مچ آ قوم تا مفاد آتا ضمانت ئِ۔ او پارینے کہ دہشت گردی نا بر خلاف علاقائی و جہانی اتفاق رائے ودی کننگ نا گرج ئِ تانکہ دہشت گردی نا لعنت ئِ ماس آ ن کشسا خسنگے۔عراق نا وزیر دفاق بریگیڈیئر جنرل عرفان الحیانی دہشت گردی نا برخلاف جنگ اٹی ایرانی حکومت ،الس و سلہہ بندفوج انا مخ تفی نا منت واری ئِ ہرفسا او پارے کہ داعش آ عراقی الس نا فتح ٹی فیصلہ کن کڑدداادا کرےنے۔عراقی وزیر دفاع پارےنے کہ ہڑتوم آ ملک آتا نیام اٹی دفاعی و فوجی کمک ئِ ودفنگ نا گرجئِ ۔ یات سلے کہ عراق نا وزیر دفاع تینا ایرانی ہم منصب نا سلہ غا بڑزکو کہولی دفاعی ڈل ا تون اوار تدوک آ دے آ تہران آ سرمسوسس۔
