اسلام آباد۔ 20 فروری (اے پی پی) قومی احتساب بیورو (نیب) و نجی بشخ انا چندی تعلیمی وطبی ادارہ غاتا نیام اٹ مفاہمت نا 6 معاہدہ غاتیا نیب ہیڈکوارٹرز اسلام آباد دستخط کننگا۔ چیئرمین نیب نا وژن نا رداٹ نیب انا چندی ادارہ غاتون پین تین پہ تینی معاہدہ زیر تکمیل ءُ ہرافتا مسخت تین پہ تینی کمکاری اٹ کارکڑد و خذمت آتا آب ءِ گچین کننگ و نیب انا ملازم آتیکن آسراتی و آسانی ودی کننگ ءِ۔ قائم مقام چیئرمین نیب سہیل ناصر، پروسیکوٹر جنرل اکاؤنٹیبلیٹی سید احتشام قادر شاہ، ڈائریکٹر جنرل نیب ہیڈ کوارٹرز فرمان اللہ، چیئرمین نیب انا سلاہکار ظفراقبال نا ساڑی گری ٹی ڈائریکٹر نیب ہیڈکوارٹر ز محمد عمران بٹ و پنی آ انٹرنیشنل ہسپتال نا سی ای او شعیب احمد خان ، علی میڈیکل سینٹر نا سی ای او ڈاکٹر بلال ارشد بٹ، قمرجہاں ڈائیگنوسٹکس نا سی ای او زبیر ناصر ، عامر نیئر، ڈینٹل نا چیف ڈینٹل سرجن ڈاکٹر عامر کیوخواجہ، ایس جے ڈینٹل اینڈ سکن نا سی ای او ڈاکٹر انعم جاوید چیمہ، ڈی واٹسن کیمسٹ نا سی ای او ظفر بختاوری نا کنڈآن مفاہمت نا سمجھوتہ غا دستخط کننگا۔ نیب انا ایلو آفیسر آک ہم داوخت آ ساڑی ئسر۔ پنچ شنبے نادے آ نیب آن جاری بیان نا رداٹ قائم مقام چیئرمین نیب سہیل ناصر داوخت آ ہموغٹ ادارہ غاتا منتظمین آتا منت واری ءِ ہرفے کہ مفاہمت نا سمجھوتہ نا رداٹ داادارہ غاک نیب ملازم آتیکن تینا خذمت بارعایت فراوان کیرہ ہرانا سوب آن ملازم آتے تعلیمی و طبی آسراتی تتون اوار اوار ایلو زند انا گرج آتا دوئی کننگ اٹ ریلیف دوئی مریک و داوڑنا ملازم آک تینا فرض ءِ منصبی ذہنی آسودگی و است جمی اٹ سرترسا ملکی شونداری ٹی تینا گچین کڑد ءِ ادا کننگ کیرہ۔ داآسراتی آن نیب انا ریٹائرڈ ملازم و اوفتا خاہوت آک ہم فائدہ ہرفرہ۔ اوپارے کہ ساڑی آ معاہدہ غاتارداٹ نیب ملازم آک جان جوڑی نا بشخ اٹی تعلقدار ادارہ غاتا رعایتی پیکج آن فائدہ ہرفنگ کیرہ و داوڑنا پین معاہدہ غاتیا ہم سجفنگ انگءِ۔ قائم مقام چیئرمین نیب سہیل ناصر پارے کہ چیئرمین نیب انا کماشی ٹی نیب انا ادارہ وڈی خوری نا مون ءِ توننگ و الس ءِ دا چرجوئی ٹی مون تروک مشکل آتا دمدستی ازالہ کن چندی ادارہ غاتون اواری اٹ کاریم کننگ ءِ۔
