باکو۔19فروری (اے پی پی): سینیٹ ءِ چیئرمین سید یوسف رضا گیلانی ءَ گوشت کہ تیزی ءَ گوں بدل بوھوکیں جھان ءِ جاور ھال آنی تہ ءَ ایشیائی دمگ ءَ یک انچیں مرکزی پوزیشن ءِ سر ءَ قبضہ کتگ کہ اودا پارلیمانی سفارتکاری ءَ را میاں اوستمانی سیادی آنی دیمروئی ءِ تہ ءَ کلیدی کرد پیلو کت کنت وھدے کہ پارلیمانی سفارتکاری ءِ تہ ءَ اے گپ ءُ تران ءِ نیام ءَ یک موثریں وسیلگ جوڑ بوت کنت۔ آذربائیجان ءِ بنجاھی شھر باکو ءَ برجم داشتگیں ایشیائی پارلیمانی اسمبلی ءِ ال سیشن ءَ چہ دیم ءَ اتکگ۔ سینیٹ ءِ چیئرمین سید یوسف رضا گیلانی ءَ گوشت کہ اے ھاسیں دیوان ءَ گوں گشتانک دیگ منی واستہ شرپ ءِ گپ اِنت آئی ءَ آذربائیجان ءِ پارلیمنٹ ءُ حکومت ءِ کوشست آنی توسیپ کت ءُ دیوان ءِ واستہ مثالی بندوبست آناں شگر ءُ منت گپت۔ سید یوسف رضا گیلانی ءَ گوشت کہ انسانی ھک، جمہوریت، پائیدار دیمروئی ءُ امن ایشیائی ملک آنی یکجائی مول ءُ مراد اَنت ءُ اے درگت ءَ درستیں ریاست آناں یکجائی ءَ کار کنگ لوٹ ایت چیئرمین سینیٹ ءَ جہانی ءُ دمگی ارزشت ءِ جتا جتائیں جیڈھ آنی سر ءَ وتی ھیال آنی درشان کنان ءَ اے گپ ءِ سر ءَ زور پر دات کہ آئی ءَ را سفارتکاری ءِ وسیلگ ءَ یکجائی ءَ را گیش ءُ گیوار کنگ لوٹ ایت۔ دمگ ءِ دیم ءَ اتکگیں جتا جتائیں چیلنج آنی تہ ءَ اقتصادی مشکلات، موسمیاتی بدلی، ناشرکاری ءُ دگہ جیڈھ ھوار اَنت۔ آئی ءَ گوشت کہ بین المذاہب گپ ءُ تران، وانگ ءُ زانگ ءِ شوبگ ءَ کمک ءُ دود ءُ ربیدگ ءِ ڈل آنی تبادلہ ءَ چہ دمگی یکوئی ءُ یکوئی ءَ را گیش کنگ بوت کنت۔ سید یوسف رضا گیلانی ءَ اقتصادی یکوئی، امن ءُ پائیدار دیمروئی ءِ واستہ پاکستان ءِ جزم ءِ یک رندے پدا گوشت کہ اے پی اے، ایس سی او ءُ ایکو ءِ وڑیں دمگی کثیر جہتی فورم امن، دیمروئی ءُ اقتصادی کمک ءِ دیمروئی ءِ واستہ ھاسیں کرد پیلو کنگ ءَ انت۔ سی پیک ءِ ھوالگ ءَ چیئرمین سینیٹ ءَ گوشت کہ اے منصوبگ دمگی کمک ءَ را دیمروئی دیگ ءَ مرکزی کرد پیلو کنگ ءَ انت ءُ ایشی ءَ چہ سرجمیں خطہ ءَ را اقتصادی آسراتی رسیت آئی ءَ گوشت کہ دمگی امن ءَ را دیمروئی دیگ ءِ واستہ گامگیج مئے اولی ترجی آنی تہ ءَ ھوار انت۔ آئی ءَ گیش گوشت کہ پاکستان ماحول دوستیں ٹرانس نیشنل انرجی منصوبگ ءُ جنگل آنی بحالی ءِ پروگرام آنی وسیلگ ءَ دمگی دیمروئی ءِ تہ ءَ مزنیں کرد پیلو کنگ ءَ اِنت آئی ءَ موسمی بدلی ءِ ھلاپ ءَ جنگ، آپی وسیلگ آنی رکھینگ ءُ توانائی ءِ شوبگ ءَ پارلیمانی کمک ءُ کمک ءِ ضلورت ءِ سر ءَ ھم زور پر دات۔ سینیٹ ءِ چیئرمین سید یوسف رضا گیلانی ءَ گوشت کہ اے پی اے یک انچیں پلیٹ فارم ءِ پجارینگ ءَ اِنت کہ ایشی ءِ تہ ءَ دمگی پالیسی آنی سر ءَ تپاکی، کانودی فریم ورک، ءُ تعمیری بحث کنگ بوت کنت۔ آئی ءَ گوشت کہ پیسلہ کنگ ءِ عمل ءَ زالبول ءُ نوکیں نسل ءِ بھر زوری ءَ را دل یکیمی کنگ لوٹ ایت۔ وتی گشتانک ءِ تہ ءَ سینیٹ ءِ چیئرمین سید یوسف رضا گیلانی ءَ ایشیائی پارلیمانی اسمبلی ءِ باسک ءِ بستار ءَ عمان ءِ درخواست ءِ سر ءَ وتی مھکمیں حمایت ءِ جار جتگ ءُ ھمے وھد ءَ نگدکار ءِ بستار ءَ بیلاروس ءِ حمایت ءِ جار ھم جتگ۔ ایشیائی پارلیمانی اسمبلی ءِ 15می سالی دیوان ءِ بہر زوروکاں سینیٹ ءِ چیئرمین سید یوسف رضا گیلانی ءَ را مھکمیں موقف پیش کنگ ءِ سر ءَ توسیپ کتگ ءُ آئی ءِ گشتانک ءَ را ساڑاتگ۔ اے موہ ءِ سر ءَ چیئرمین سینیٹ ءَ ایران، عمان، آذربائیجان، ازبکستان ءُ بحرین ءِ پارلیمانی ادارگ آنی سروک آنی گوما ھم گند ءُ نند کت اے گند ءُ نند آنی تہ ءَ وت مہ وتی کمک آنی تہ ءَ ترندی کنگ، پارلیمانی رابطہ ءُ ڈل آنی مٹ ءُ بدلی ءِ ھوالگ ءَ سرجمیں رنگ ءَ گپ ءُ تران کنگ بوت۔ راہشون آں دمگی دیوان آنی تہ ءَ کمک ءَ را گیش کنگ ءِ سر ءَ تپاک کت۔ سینیٹ ءِ چیئرمین ءَ گوشت کہ پاکستان ءَ مدام دمگی امن، پارلیمانی رابطہ، ءُ مزن تک ءِ ڈل آنی تبادلہ ءِ سر ءَ زور داتگ۔ آئی ءَ گوشت کہ دمگی امن ءُ دیمروئی ءِ دیمروئی مئے درست آنی یکجائی ذمہ واری اِنت آئی ءَ گیش گوشت کہ تجارتی کار آنی دیمروئی ءُ مردم آنی نیام ءَ رابطہ آناں گیش کنگ وھد ءِ ضلورت اِنت۔ آئی ءَ اے گپ ءِ سر ءَ زور پر دات کہ یکجائی جیڈھ آنی گیواری ایوک ءَ یکجائی ءَ چہ دست کپ ایت ءُ پاکستان اے درگت ءَ ھرچ وڑیں کمک ءِ واستہ تیار اِنت۔
