نیویارک/اسلام آباد۔ 19 فروری (اے پی پی) نائب وزیراعظم و وزیرخارجہ سینیٹر محمد اسحاق ڈار سعودی عرب نا نائب وزیرخارجہ انجینئر ولید عبدالکریم الخیریجی تون نیویارک اٹی اوڑدہی کرے۔ چارشنبے نادے آ دفترخارجہ غان جاری بیان نا رداٹ نائب وزیراعظم پاکستان و سعودی عرب نا متکن آ تعلقداری تا ستاءِ کرسا سعودی عرب تون ہڑتوم آ کنڈآتا اقتصادی و سیکورٹی کمکاری ءِ پین سوگو کننگ کن پاکستان نا بدل مفروک عزم انا درشانی ءِ کرے۔ اوولی عہد و سعودی عرب نا وزیراعظم شہزادہ محمد بن سلمان و شاہ سلمان بن عبدالعزیز السعود نا دوراندیش کماشی ٹی سعودی عرب نا کنڈآن کروک آ قابل ذکر پیش رفت نا ستاءِ کرے و علاقائی و جہانی امن وسلامتی نا مون آ دننگ اٹ سعودی عرب نا اہم کڑد انا ذکر ءِ کرے۔ اوڑدہی ٹی ہڑتوم آ راہشونک ہڑتوم آ ملک آتا نیام اٹ سٹریٹجک و اقتصادی تعلقداری تے امنا کریر و پاکستان اٹ زرکاری نا گیشتر وارخواہی تیا زور شاغسا اقتصادی کمکاری ءِ ودفنگ و واپار، زرکاری و واپاری بشخ آتیٹی گیشتر بنداو کمکاری نا وارخواہی پٹنگ نا عزم انا درشانی ءِ کریر۔ ہڑتوم آراہشونک غزہ و دیکی کنارہ نا سنگین انسانی حالیت آتون اوار دے ٹک نیامی نا ساڑی آ پیش رفت آہم گپ وتران کریر۔ اوغزہ جنگ بندی نا پورو نفاذ، غزہ نا مخلوق ءِ جوان و بے روک ٹوک انسانی امداد نا فراوانی و تعمیر نو نا زوت بنا و اِراریاستی ایسری نا کنڈآ پیش رفت آ زور شاغار۔ اومسلم امہ نا بابت ویل آتا ایسری ٹی اسلامی کمکار تنظیم (اوآئی سی) نا اہم کڑد آ ہم زور شاغار۔ اوڑدہی ٹی تین پہ تینی شونہالی و علاقائی سوگوی کن کثیر الجہتی شریداری ءِ ودفنگ کن پاکستان و سعودی عرب نا اسیجائی عزم انادرشانی ءِ کننگا۔
