ریاض۔ 19 فروری (اے پی پی) بنجائی وزیر حوالکاری و شینکاری، قومی میرات و دودوربیدہ عطاء اللہ تارڑ چارشنبے نادے آ سعودی میڈیا گروپ نا کنڈآن کانفرنس نا بنائی سیشن اٹی بشخ ہلک۔ مسہ دے ئی کانفرنس 19آن 21 فروری اسکان ریاض اٹی اڈہلنگ ءِ۔ بنائی سیشن اٹی مچ آ دنیا غان جہانی راہشون تتون اوار میڈیا غان تعلق تخوک آ اہم شخصیت آک شریک ءُ۔ کانفرنس اٹی سعودی عرب نا وزیر توانائی شہزادہ عبدالعزیز بن سلمان ال سعودہم شریک ءِ۔ بنجائی وزیر حوالکاری عطاء اللہ تارڑ نا بنائی دود انا وخت آ برطانیہ نا مسکوہی وزیراعظم بورس جانسن تون اوار ایلو اہم شخصیت آتون اوڑدہی ہم مس۔ یات سلے کہ سعودی میڈیا فورم اٹی میڈیا پروڈکشن، ڈیجیٹل جرنلزم و مواد سازی نا بارواٹی وڑوڈول پٹنگک۔ ڈیجیٹل دور اٹی میڈیا، ڈیجیٹل ٹرانسفارمیشن و مالیاتی سوگوی کن پوسکن آ بزنس ماڈل آتا جاچ ءِ ہلنگک۔ میڈیا فورم اٹی فیک نیوز، السی پت انا بحالی ٹی میڈیا ادارہ غاتا کڑد انا بارواٹی حکمت عملی آ ہم سجفنگک۔ فورم اٹی آرٹیفیشل انٹیلی جنس، صحافت نا آخبت، میڈیا اکنامکس، ڈیجیٹل نظام، مس انفارمیشن ، انٹرٹینمنٹ انڈسٹری، ڈیجیٹل سٹریمنگ کون آاہم سرحال آتیا شرہ ہم اڈہلیک۔
