اسلام آباد۔ 19فروری (اے پی پی) وزیراعظم محمد شہباز شریف پارینے کہ پاکستان و بحرین نا ایلمی تعلقداری بھا ز سوگو و اسیجائی عقیدہ، تاریخ و دودوربیدہ غا تالان ءِ، السی رابطہ غاتا مون آ دننگ کن پارلیمانی ڈل آتا ہن و بر بھا زاہم ءِ، پاکستان، بحرین و امت مسلمہ غزہ وفلسطین اٹی تینا ایلم و ایڑھ تا امداد کن تینا کوشست آتے ترند کیر۔ چارشنبے نادے آ وزیراعظم آفس پریس ونگ آن جاری بیان نا رداٹ وزیراعظم محمد شہباز شریف تون بحرین نا مجلس النواب (کونسل آف ریپریز نٹیٹیوز) نا اسپیکر احمد بن سلمان ال مسالم نا کماشی ٹی 11 باسکی پارلیمانی ڈل اوڑدہی کرے۔ اوڑدہی ٹی وزیراعظم بحرین نا فرمانروااحمد بن عیسیٰ بن سلمان الخلیفہ کن نیک است خواہی نا درشانی ءِ کرساپارے کہ پاکستان و بحرین نا برادرانہ تعلقداری بھاز سوگو واسیجائی عقیدہ، تاریخ و دودوربیدہ غاتالان ءِ۔ وزیراعظم پارے کہ ہڑتوم آ ایلم ملک آتا نیام اٹ السی رابطہ غاتا سوگوی کن پارلیمانی ڈل آتا ہن و بر بھا زاہم ءِ، داوڑنا گام گیج آتیان تین پہ تینی تعلقداری پین سوگو مریک۔ وزیراعظم محمد شہباز شریف بحرین نا زرکارآتے پاکستان اٹ زرکاری نا سلہ ہم خلک۔ اوپارے کہ بحرین اٹی ساڑی پاکستانیک چندی بشخ آتیٹی بھاز اہم خذمت سرتننگ ءُ۔ وزیراعظم پاکستان و بحرین نا ساڑی آ واپاری کچ ءِ پین ودفنگ آ ہم زور شاغا۔ اوپارے کہ پاکستان، بحرین و مچ آ امت مسلمہ غزہ وفلسطین اٹی تینا ایلم وایڑھ تاامداد کن کوشست آتے ترند کیر۔ اوڑدہی ٹی اسپیکر قومی اسمبلی سردار ایاز صادق، خصوصی کمکار طارق فاطمی و بڑزکو سرکاری کمامدارآک ہم ساڑی ئسر۔
