نیویارک/اسلام آباد۔ 19فروری (اے پی پی) نائب وزیراعظم و وزیرخارجہ سینیٹر محمد اسحاق ڈار نیویارک اٹی اقوام متحدہ نا سیکرٹری جنرل انتونیوگوتریش تون اوڑدہی کرے۔ دفترخارجہ نا رداٹ نائب وزیراعظم داوخت آ امن و سلامتی ، شونداری و موسمیاتی بدلی تون اوار جہانی چیلنج آتون مون تننگ کن اقوام متحدہ نا مرکزی کڑد اکن پاکستان نا پبی مخ تفی نا درشانی ءِ کرے۔ اوسال 2025 و 2026 اٹی اقوام متحدہ نا سلامتی کونسل نا بے آخبتی باسک انا حیثیت اٹ جہانی امن و سلامتی ءِ مون آدننگ کن پاکستان نا بدل مفروک عزم اتون اوار اوار کثیر الجہتی و اقوام متحدہ نا چارٹر کن پاکستان نامتکن آ تعلقداری بشمول اقوام متحدہ نا امن نا کوشست آتے تالان کرے۔ اواقوام متحدہ نا سیکرٹری جنرل نا کنڈآن ’’سمٹ آف دی فیوچر‘‘ نا اڈتننگ نا گام انا خیرمقدم ءِ کرسا دااومیت نا درشانی ءِ کرے کہ ’’پیکٹ فاردی فیوچر‘‘ کن معاہدہ ءِ پورو وڑاٹ نافذ کننگک، ہراپائیدار شونداری وموسمیاتی ہدف آتے نانافذ کننگ کن پدتموک ملک آتا مالیاتی گرج آتے پورو کیک۔ نائب وزیراعظم جموں وکشمیر نا جھیڑہ ءِ سلامتی کونسل نا قرارداد آتا رداٹ انصاف اٹ ایسر کننگ آ زور شاغا۔ فلسطینی الس نا برخلاف اسرائیل نا ظلم انامذمت ءِ کرسا نائب وزیراعظم اِرا ریاستی ایسری کن پاکستان نا بدل مفروک مخ تفی نا درشانیءِ کرے ہراٹی 1967 آن مست انا سیم تیا تالان اسہ قابل ءُ عمل، متصل و وتواجہ فلسطینی ریاست اسے نا دارالحکومت القدس الشریف مرے۔ نائب وزیراعظم سیم آن ایپار اوغانستان آن مروک آ دہشت گردی ءِ ہم تالان کرے و اوغانستان نا تہہ آن دہشت گردی نا مقابلہ ءِ کننگ کن اقوام متحدہ نا مخ تفی آ زور شاغا۔ اواوغانستان اٹی لکھ آ بے سیبو مخلوق ءِ انسانی ہمدردی نا بنداو آ کمک فراوان کننگ و اونا اقتصادی شونداری ءِ مون آدننگ نا پاکستان نا است خواہی نا ہم درشانیءِ کرے ہراٹی اوغانستان نا کسر نیامی ایشیاء و پاکستان نا نیام اٹ رابطہ نا ڈٹ آتیا عملدرآمد ہم اوار ءِ۔ اقوام متحدہ نا سیکرٹری جنرل انتونیوگوتریش نائب وزیراعظم نا اقوام متحدہ ٹی پاکستان نا فعال شمولیت تون اواراوار جہانی امن و سلامتی کن اقوام متحدہ نا امن مشن اٹی کڑد ادا کننگ آ منت واری ءِ ہرفے۔ نائب وزیراعظم و وزیرخارجہ داوخت آ اقوام متحدہ نا سلامتی کونسل نا بڑزکو کہولی دیوان اٹی بشخ ہلنگ کن نیویارک نا دورہ غاٹی ءِ ہرا چین سلامتی کونسل نا کماشی ٹی بٹنگاسس۔
