اسلام آباد۔ 19 فروری (اے پی پی) بنجائی وزیر واپار جام کمال خان جاپان نا بادشاہ نا سال دے انا شاندار دود اٹی بطور مہمان خاص بشخ ہلک۔ وزارت واپار نا جاری کروک اعلامیہ نا رداٹ دود داڑے تدوک آنن اڈہلک۔ دود آن تران کرسا وزیر واپار حکومت پاکستان و الس نا کنڈآن جاپانی بادشاہ ءِ مبارکبادی پیش کرے و اودے سیوت امن و شونہالی نا نشانی گوندا۔ تینا تقریر اٹی وزیر واپار جاپانی بادشاہ نا دور ءِ خراج تحسین پیش کرسا پارےکہ اونا کماشی جاپان ءِ شونداری ، ٹیکنالوجی، دودوربیدہ و پائیدار شونداری ٹی جہانی کہول آ نمان ہند اس ترفینے۔ اوپارے کہ اونا حکمت عملی، ہم گرنچی، استقامت و جدت پسندی نئے بیرہ جاپان ءِ بے مٹ شونداری نا کنڈآ درے بلکن مچ آ دنیا کن اسہ درور اس ہم قائم کرینے۔ اوجاپان نا جہانی امن، انسانی امداد و چاگڑدی رکھ انا گام گیج آتا ستاءِکرسا پارے کہ دا اصول پاکستان نا ہدف آتون پورو مطابقت تخک۔ جام کمال پارے کہ جاپان نا جہانی امن و جہانی کمکاری نا مون آ دننگ کن کوشست اومیت وروشنائی نا نشان ءِ، ہراڑآن مچ آدنیا ءِ فائدہ ملنگ ءِ۔ جام کمال خان پارے کہ پاکستان و جاپان نا نیام اٹ متکن آ تعلقداری تین پہ تینی شرف، اسیجائی قدر و اقتصادی و دودوربیدہ ئی کمکاری آ تالان ءِ ۔ اوپارےکہ پاکستان جاپان تون تعلقداری تے بھا زاہمیت ایتک و واپاری، زرکاری و انسانی وسیلہ غاتا شونداری ٹی پین گچینی نا خواہندار ءِ۔ اوداہیت ءِ مو ن آتخاکہ پاکستان وجاپان نا نیام اٹ ہڑتوم آ کنڈآتا واپار نا کچ 1.27ارب ڈالر ءِ، ولے داٹی پین ودکی نا بھاز گنجائشت ساڑی ءِ۔ اوپارے کہ جاپان نا ٹیکنالوجی ، بنداوی پنجر و اختراعات اٹی مہارت پاکستان نا زرگزرانی شونداری نا وژن تون پورو ہم گرنچ ءِ ، و نن کاروباری برادری کن پین وارخواہی ودی کننگ کن سنبرینگوک اُن۔
