فعال سفارتکاری نا کمک اٹ پاکستان نا سفارتی تنیائی چٹانے، نائب وزیراعظم و وزیرخارجہ اسحاق ڈار نا نیویارک اٹی پاکستانی کمیونٹی آن تران

نیویارک ۔ 18فروری (اے پی پی) نائب وزیراعظم و وزیرخارجہ سینیٹر محمد اسحاق ڈار پارینے کہ پاکستان نا فعال سفارتکاری نا کمک اٹ سفارتی تنیائی چٹانے، وزیراعظم محمد شہباز شریف نا کماشی ٹی حکومت نا کارکڑد اٹی قومی زرگزران شونداری نا کنڈآ ہِننگ ءِ۔ داخیال آتا درشانی ءِ سینیٹر محمد اسحاق ڈار تینا دورہ ءِ امریکہ ٹی تدوک آ نن پاکستانی کمیونٹی تون اوڑدہی نا وخت آکرے۔ اونیویارک اٹی پاکستان قونصلیٹ اٹی پاکستانی کمیونٹی تون 2 گھنٹہ مرغن ءُ اوڑدہی اس کرے۔ داوخت آ اوپارے کہ داسہ نن سفارتی وڑاٹ تنیاافن، جہانی برادری ٹی پاکستان نا بھاز انگا سنگت آک ءُ، وپاکستان زوت آتے اٹ 2 بھلا جہانی ایونٹ سرسہب اڈتسنے۔ ایس سی او کانفرنس و مسلم راج اٹی مسن تا تعلیم نا بابت جہانی کانفرنس اٹی کیہی ملک آتا سروک مملکت آک پاکستان نا دورہ ءِ کرینو وخت اس کہ ترکیہ نا صدر رجب طیب اردوان ہم پاکستان تون یکجہتی نا درشانی ءِ کرینے۔ داوخت آ سینیٹر محمد اسحاق ڈار اقوام متحدہ نا سلامتی کونسل اٹی 2 سال انا مد اکن پاکستان نا 182 وونٹ آتا بھلو گیشتری اسے ات گچین کاری تے ہم تالان کرے۔ پاکستانی کمیونٹی تون اوڑدہی نا وخت آ اقوام متحدہ ٹی پاکستان نا آخبتی مندوب منیر اکرم، امریکہ ٹی پاکستان نا سفیر رضوان سعید شیخ، اقوام متحدہ ٹی متبادل آخبتی مندوب عاصم افتخار احمد ونیویارک اٹی پاکستان نا قونصل جنرل عامرعطازئی ئسک ہم ساڑی ئسر۔ وزیرخارجہ پارے کہ 2013-17ٹی مسکوہی وزیراعظم محمد نواز شریف نا کماشی ٹی ملک انا زرگزران سوگو مس اوکان پد قومی زرگزران زوال نا گواچی ئس و ملک ءِ خواتہ مننگ نا خڑک سرکننگا۔ اووزیراعظم محمد شہباز شریف نا کماشی ٹی ساڑی حکومت نا زرگزرانی بحالی نا گام گیج آتے تالان کرساپارے کہ افراط زر انا کچ 40 درسد آن کم مرسا جنوری 2025اٹی 2.4درسد اسکان بسنے ہرانا سوب آن پالیسی ریٹ انا کچ اٹی ہم کمتی مسنے۔