اسلام آباد۔ 17 فروری (اے پی پی) بحرین نا پارلیمانی ڈل ایوان نمائندگان نا صدر احمد بن سلمان المسلم نا کماشی ٹی پارلیمنٹ ہاؤس نا دورہ ءِ کرے و اسپیکر قومی اسمبلی سردار ایاز صادق تون اوڑدہی کرے۔ اوڑدہی ٹی ہڑتوم آکنڈآتا تعلقداری، جوان وارخواہی، و پارلیمانی کمکاری ءِ مون آ دننگ آ سرجمی اٹ گپ وتران کننگا۔ اسپیکر قومی اسمبلی سردار ایاز صادق بحرینی پارلیمانی ڈل ءِ جم وجوش اٹ بخیرکرےوپارلیمنٹ ہاؤس آ بننگ آ ڈل انا منت واری ءِ ہرفے۔ بحرینی ایوان نمائندگان نا صدر احمد بن سلمان المسلم پارلیمنٹ ہاؤس اٹی جم و جوش اٹ بیابخیری آ منت واری ءِ ہرفے۔ بحرینی اسپیکر احمد بن سلمان المسلم اسپیکر قومی اسمبلی سردار ایاز صادق تون اوڑدہی کرے، ہراٹی پاک ۔ بحرین فرینڈ شپ گروپ نا قائم مقام کنوینر و باسک قومی اسمبلی چوہدری محمد شہباز بابرہم ساڑی ئسک۔ اوڑدہی ٹی ہڑتوم آ کنڈآتا تعلقداری، واپاری وارخواہی، و پارلیمانی کمکاری ءِمون آ دننگ آ سرجمی اٹ گپ وتران کننگا۔ ہڑتوم آ راہشونک پاک ۔بحرین پارلیمانی تعلقداری تے پین سوگو کننگ آ امنا کریر۔ اسپیکر قومی اسمبلی پارے کہ پارلیمانی رابطہ غاتیٹی ودکی ہڑتوم آ قوم تے خڑک اتنگ اٹ اہم کڑد ادا کننگ کیک۔ اسپیکر قومی اسمبلی سردار ایا ز صادق پارے کہ پاکستان بحرین تون تینا ہڑتوم آ کنڈآتا تعلقداری تے بھاز اہمیت ایتک۔ پاکستان و بحرین نا نیام اٹ خڑکی برادرانہ تعلقداری ساڑی ءِ ہرا مذہبی ، دودوربیدہ ئی و تاریخی قدر آ تالان ءُ۔ ہڑتوم آ ایلم ملک آتیٹی اقتصادی، واپاری و ایلو بشخ آتیٹی کمکاری ءِ مون آ دننگ نا گیشتر وارخواہی ساڑی ءِ۔ اسپیکر سردار ایاز صادق مستی پارے کہ ہڑتوم آ ملک آک اہم علاقائی و جہانی امور آ اسہ وڑموقف تخرہ و علاقائی و جہانی فورم تیا مدام اسہ ایلو نا موقف نا مخ تفی ءِ کرینو۔ اسپیکر قومی اسمبلی پارے کہ پاکستانی پردیسی تا بھلو کچ اس بحرین اٹی ءُ و ہڑتوم آ ملک آتا شونداری ٹی اہم کڑد ادا کننگ ءُ۔ پاکستان نا دورہ غا بروک بحرینی ایوان نمائندگان نا صدر احمد بن سلمان المسلم پارےکہ بحرین پاکستان ءِ اسہ اہم برادر و سنگت ملک اس تکک و پاکستان نا دورہ ءِ کرسا بھاز خوشی محسوس کننگ اٹی اُٹ۔ بحرینی اسپیکر پارے کہ پاکستان و بحرین نا نیام اٹ تعلقداری کیہی دہائی تیا تالان ءِ۔ بحرین پاکستان تون پارلیمانی، واپاری، آئی ٹی و ایلو متفرق بشخ آتیٹی کمکاری ءِ مون آ دننگ خواہک۔ بحرین نا پارلیمان پاکستان نا پارلیمان تون آئی ٹی نا بشخ اٹی ہرممکن کمک فراوان کیک۔ بحرینی اسپیکر پاکستان اٹ جم وجوش اٹ بخیر آ اسپیکر قومی اسمبلی و اونا ٹیم انا منت واری ءِ ہرفے۔ بحرینی اسپیکر پارےکہ پاکستان و بحرین نا نیا م اٹ واپاری رابطہ غاتے پین مون آدننگے و پاک ۔ بحرین فرینڈ شپ گروپ ءِ پین سوگو کننگ نا است خواہی نا درشانی ءِ کرے۔ اوپارے کہ پاکستان اسہ اسلامی ملک آتیٹی اسہ اہم ملک اس تصور کننگک و بحرین پاکستان ءِ قدر انا نظر اٹ ہرک۔ بحرین نا اسپیکر پارے کہ بحرین پاکستان تون پارلیمانی، واپاری و عسکری تعلقداری تے مون آ دننگ خواہک۔ بحرین اٹی رہینگوک پاکستانیک ہموجاگہ نا شونداری ٹی اہم کڑد ادا کننگ ءُ، و اسہ خوشگوار و پرامن زنداس تیرکننگ ءُ۔ اسپیکر قومی اسمبلی سردار ایاز صادق پارے کہ پاکستان و بحرین نا نیام اٹ پارلیمانی، واپاری و سفارتی و دفاعی بشخ آتیٹی کمکاری نا گیشتر وارخواہی ساڑی ءِ۔ بحرین، سعودی عرب و پاکستان نا نیام اٹ پارلیمانی رابطہ غاتا مون آ دننگ آن آزموندہ غاتیان فائدہ ہرفنگ ناموقع ملک۔ اوپارے کہ پاکستان اٹ سیل و سوات نا بشخ اٹی بھلووارخواہی اس ساڑی ءِ و پاکستان نا قطبی علاقہ غاک دنیا نا چکارنا مرکز ءُ۔ اسپیکر قومی اسمبلی پارےکہ پاکستان نا غٹ صوبہ و قطبی علاقہ جات نا دورہ ءِ کرسا ہی پاکستان نا حقی تشخص نا کساسءِ خلنگ مریک۔
