اسلام آباد۔16فروری (اے پی پی):منصوبگ بندی، دیمروئی ءُ ھاسیں گامگیج آنی وفاقی وزیر احسن اقبال ءَ پاکستان ءِ ورنا آناں معیاری نوکیں وانگ ءُ زانگ ءِ پھجارینگ ءِ حکومت ءِ عزم ءِ سر ءَ زور پر دات ءُ ملک ءِ وانگ ءُ زانگ ءِ نظام ءَ را میاں اوستمانی معیار آنی رد ءَ آرگ ءِ ضلورت ءِ سر ءَ زور پر دات ءُ گوشت کہ نودربر آناں توانمند کنگ بیت۔ احسن اقبال ءَ یک نجی نیوز چینل ءِ گوما تران کنان ءَ گوشت کہ ما وتی ورنا آناں جوانیں وانگ ءُ زانگ ءِ پھجارینگ ءِ واستہ جزم آں، آھاں را جھان ءِ تک ءَ مقابلہ کنگ ءُ نوکیں چیلنج آنی دیم ءَ دارگ ءِ واستہ توانمند کنگ بیت۔ آئی ءَ گوشت کہ پاکستان (STEM) وانگ ءُ زانگ ءِ سر ءَ دلگوشی دیگ ءَ اِنت تانکہ وتی ورنا آناں بیست ءُ یکمی کرن ءِ واستہ لوٹوکیں ھنر ءُ زانت ءَ چہ لیس کنگ بہ بیت۔ آئی ءَ گیش کرتگ کہ اے گامگیج ءِ مول ءُ مراد نودربر آنی تہ ءَ وانگ ءُ زانگ، تنقیدی ھیال ءُ لیکہ ءُ جیڑھانی گیش ءُ گیوار ءِ زانت ءُ زانشت ءِ دیمروئی اِنت۔ احسن اقبال ءَ یک رندے پدا گوشت کہ نوکیں وانگ ءُ زانگ پاکستان ءِ جھان ءِ مقابلہ ءِ توانائی ءِ پچ کنگ ءِ کلید اِنت۔ آئی ءَ ملک ءِ وانگ ءُ زانگ ءِ نظام ءَ را گہتر کنگ ءِ وعدہ کتگ تانکہ شمولیت ءُ پائیداریں راجی دیمروئی ءَ را دل یکیمی کنگ بہ بیت۔ آئی ءَ ورنا آنی واستہ مہارت ءِ سر ءَ بنیات ءِ سر ءَ وانگ ءُ زانگ ءِ ارزشت ءِ سر ءَ زور پر دات ءُ گوشت کہ آوانی واستہ ھما مہارت آنی گرگ سک باز المی اِنت کہ نوکیں روزگار ءِ مارکیٹ ءَ لوٹ ءُ گزر ءِ تہ ءَ اَنت، ایشی ءَ چہ آ جوانیں رنگ ءَ مقابلہ کنگ ءُ جوانیں روزگار ءِ موہ آناں پچ کنگ ءِ ھاترا توانمند بنت۔ آئی ءَ گوشت کہ ورنا راج ءِ مستریں سرمایہ انت، پاکستان ءِ دیمروئی ءُ وشھالی ءِ واستہ آھانی وانگ ءُ زانگ ءُ ہنر ءِ دیمروئی ءَ سرمایہ کاری کنگ المی انت۔ احسن اقبال ءَ ورنا آناں بااختیار جوڑ کنگ ءِ واستہ حکومت ءِ گامگیج آنی سر ءَ زور پر دات، ایشی ءِ تہ ءَ ورنا آنی وام ءِ اسکیم، مہارت ءِ دیمروئی پروگرام ءُ لیپ ٹاپ اسکیم ھوار اَنت، ایشی ءِ مول ءُ مراد ورنا پاکستانی آناں مالی کمک، مہارت ءِ تربیت ءُ ڈیجیٹل رسائی ءِ پھجارینگ اِنت تانکہ آ وتی صلاحیت آناں کارمرد بہ کن اَنت ءُ ملک ءِ دیمروئی ءَ کمک بہ کن اَنت۔
