اسلام آباد۔13فروری (اے پی پی):مزن وزیر محمد شہباز شریف ءَ پاکستان ءَ سرمایہ کاری ءُ بیپار ءِ واستہ ھمک وڑیں کمک ءُ آسراتی ءِ بابت ءَ ترک سرمایہ کار ءُ کاروباری مردم آناں دل یکیمی داتگ ءُ گوشت کہ ما پاکستان ءُترکیہہ ءِ نیام ءَ گہتریں دوستی ءُ یکوئی ءِ کمک ءَ را گیش دیمروئی دیگ ءِ واستہ جزم ایں ۔ ترکیہہ ءِ صدر رجب طیب اردوان ءَ گوشت کہ دوئیں ملک آنی نیام ءَ تجارت ءُ سرمایہ کاری ءِ واستہ مزنیں موہ است انت دستخط کتگیں معاہدہ ءُتپاک نامہ دوئیں ملک آنی نیام ءَ جتا جتائیں شوبگ آنی تہ ءَ کمک ءَ را گیش کنگ ءَ انت۔ اے ھیالانی درشانی آئی ءَ پنچ شمبے ءِ روچ ءَ پاکستان ءُترکیہہ بزنس فورم ءَ گوں تران کنان ءَ کت۔ مزن وزیر محمد شہباز شریف ءَ گوشت کہ ما دوستی ءِ دو نیمگی سیادی آناں گیش مھکم کنگ ءِ سر ءَ گپ ءُ تران کتگ کہ بازیں سبب آنی سبب ءَ پاکستان ءُترکیہہ براتی ملک اَنت ءُ بھارت ءِ بھر ءُ بانگ ءَ چہ پیسر ھم براتی ءِ راجدپتر ءِ واھند اَنت، وھدے کہ بھارت ءِ مسلمان آناں ترکیہہ ءِ آجوئی ءِ جنگ ءِ واستہ ھرچی قربان کتگ۔ آئی ءَ گوشت کہ صدر رجب طیب اردوان ءِ زانتکاریں سروکی ءَ ترکیہہ ءِ متحرک معیشت نوکیں ٹیکنالوجی ءِ سر ءَ بندوک اِنت ءُ یورپی معیار آنی سر ءَ سرجم اِنت صدر رجب طیب اردوان مسلمان امت ءِ توار اِنت آئی ءَ مدام غزہ ءِ بے گناہ ءُ مظلوم مسلمان آناں وتی توار چست کتگ ءُ پاکستان ءَ مدام وتی توار چست کتگ۔ .آئی ءَ گوشت کہ پیسریگیں مزن وزیر نواز شریف ءِ دور ءَ دوئیں ملک آنی نیام ءَ تجارت ءُ سرمایہ کاری ءِ کساس ءَ را پنچ ارب ڈالر ءَ سر کنگ ءِ سر ءَ دل یکیمی کنگ ءَ ایں مرچی ما جتا جتائیں تپاک نامہ ءُ معاہدہ آنی سر ءَ دستخط کتگ۔ مزن وزیر ءَ کاروباری (بی ٹو بی) ءُ حکومتی (جی ٹو جی) تک ءَ اے درگت ءَ ھمک رنگ ءِ کوشست آناں کمک کت۔ آئی ءَ ترک سرمایہ کار ءُ کاروباری مردم آناں دل یکیمی دات کہ آھاں پاکستان ءَ سرمایہ کاری، درآمد ءُ برآمد ءِ واستہ ھمک رنگ ءِ کمک ءُ آسراتی پجاری کنگ بیت گوستگیں وھد ءَ سوداگر ءُ سرمایہ کار آناں دیم ءَ اتکگیں مشکل پدا نہ بنت کہ ایشی ءَ چہ دوئیں ملک آناں پائدگ رستگ پاکستان ایشانی دومی گس انت۔ مزن وزیر ءَ گوشت کہ مارا صدر طیب اردوان ءِ سروکی ءُ صلاحیت آنی سر ءَ پھر اِنت، ءُ ما پاکستان ءُترکیہہ ءِ نیام ءَ دوستی ءُ وت مہ وتی سیادی آناں گیش دیمروئی دیگ ءِ واستہ جزم آں۔ مراگش ءَ گوں گشتانک دیان ءَ ترکیہہ ءِ صدر رجب طیب اردگان ءَ گوشت کہ آ وتی دوست مزن وزیر شہباز شریف ءَ گوں گند ءُ نند ءَ سک باز وش آں اے مراگش ءَ چہ پاکستانی ءُترکیہہ ءِ کاروباری مردم آناں یک دومی ءِ گوما نزیکی کنگ ءِ موہ رس ایت۔ آئی ءَ گوشت کہ دوئیں ملک آنی نیام ءَ تجارت ءِ تہ ءَ مدام گیشی بوھگ ءَ اِنت گوستگیں سال ءَ دوئیں ملک آنی نیام ءَ تجارت ءِ کساس ءَ 30درسد گیشی بوتگ، البت پنچ ارب ڈالر ءِ تجارتی کساس ءِ ٹارگٹ ءِ سر ءَ سر بوھگ ءِ واستہ مئے توامیں تجارتی توانائی آناں کارمرد کنگ ءِ ضلورت اِنت۔ آئی ءَ گوشت کہ مئے نیام ءَ ترجیحی تجارتی معاہدہ ءَ چہ اے مول ءُ مراد ءِ سرجمی ءَ کمک رسیت، ایشی ءَ چہ برجمیں تجارتی توازن ءِ ھاترا ھم کمک رسیت۔ صدر رجب طیب اردوان ءَ گوشت کہ ما یکجائی ریل ءِ ٹرانسپورٹ ءَ را ھاسیں رنگ ءَ اسلام آباد تھمکان استنبول ءِ مال برداری ٹرین لائن ءَ را فعال بہ کن ایں پرچا کہ اے سرجمیں دمگ ءِ مفاد ءِ تہ ءَ اِنت ءُ بازیں منصوبگ آنی سر ءَ عمل کنگ ءَ کمک کنت۔ آئی ءَ گوشت کہ اقتصادی راہداری منصوبگ تجارت ءِ واستہ المی اِنت، آیوکیں وھد ءَ ایشی ءَ را جوانیں حکمت عملی ءِ گوما دیم ءَ برگ بوت کنت، پاکستانی راج ءَ مدام گرانیں وھد ءَ ترکیہہ ءِ کمک کتگ، دوئیں ملک آنی نیام ءَ مھکمیں دوستی ءِ سیادی است اِنت، دوئیں ملک آنی نیام ءَ جتا جتائیں پڑ آنی تہ ءَ کمک گیش کنگ بیت، دوئیں ملک آنی نیام ءَ سرمایہ کاری ءِ تہ ءَ مزنیں موہ است اَنت۔ غزہ ءِ جاور ھال آنی ھوالگ ءَ آئی ءَ گوشت کہ اسرائیل ءَ غزہ ءَ بے دروریں ظلم کتگ، اے جنگ ءِ تہ ءَ ھزاراں فلسطینی شھید کنگ بوتگ اَنت، جنگ بندی ءَ پد غزہ ءِ جاور ھال گہتر بوتگ اَنت، ءُ غزہ ءِ شھمکی تہنا یلہ نہ بنت ءُ ما گوں آھاں یکوئی ءِ درشان کن ایں ۔ آئی ءَ گوشت کہ پاکستان ءُترکیہہ یکجائی ءَ خطہ ءِ امن ءَ ھوار ایندگر جیڈھ آنی گیواری ءَ ھاسیں کرد پیلو کت کن اَنت مئے مرچی دستخط کتگیں معاہدہ ءُ دستاویز دوئیں ملک آنی نیام ءَ جتا جتائیں شوبگ آنی تہ ءَ کمک ءَ را دیم ءَ برگ ءَ انت۔ آئی ءَ گوشت کہ مارا راج ءِ جوانیں آیوکیں وھد ءِ واستہ سک باز محنت کنگی اِنت ءُ کاروباری برات ءِ واستہ جوانیں موہ آناں دل یکیمی کنگی اِنت۔ آئی ءَ گوشت کہ جوانیں وش آتک ءُ مہمان داری ءِ پد ءَ پاکستانی برات ءُ گھار آنی شگر ءُ منت وار آں۔
