وزیراعظم و ترک صدر ایچ ایل ایس سی سی نا ہفت می دیوان نا اسیجائی اعلامیہ غا دستخط کریر
اسلام آباد۔ 13 فروری (اے پی پی) پاکستان و ترکیہ واپار، خزانہ ، دفاع،سائنس و ٹیکنالوجی ، توانائی، حوالکاری و شینکاری ، تعلیم، جان جوڑی ، غذائی رکھ ، آبی وسیلہ، مذہبی امور تون اوار چندی بشخ آتیٹی تین پہ تینی کمکاری و شریداری ناکاریم تا مون آ دنگ کن 24 معاہدہ، پروٹوکول و مفاہمت نا یات داشت آتیادستخط و دستاویز آتا تبادلہ کریر۔ پنچ شنبے نادے آ پاکستان ترکیہ بڑزکو کہولی تزویراتی کمکاری کونسل نا دیوان آن پد وزیراعظم ہاؤس اٹی اڈ ہلوک دستخط آتا باضابطہ دود اٹی وزیراعظم محمد شہباز شریف و ترکیہ نا صدر رجب طیب اردوان بشخ ہلکر۔ وزیراعظم پاکستان و ترکیہ نا صدر پاکستان و ترکیہ نا نیام اٹ تزویراتی شریداری ءِ پین زیات کننگ و گیشتر کننگ و ادارہ جاتی دروشم اس تننگ کن پاکستان۔ ترکیہ ایچ ایل ایس سی سی نا ہفت می دیوان نا اسیجائی اعلامیہ غادستخط کریر۔ داوخت آ ہڑتوم آ کنڈآن دستخط مروک 24 معاہدہ، پروٹوکول، اعلامیہ و ایم اویوز تا تبادلہ کننگا۔ سرجم حوال آتا رداٹ راجی و دودوربیدہ ئی مسخت آتیکن فوجی و سویلین کارندہ غاتا ہل و تس آ مفاہمت نا یات داشت، ایئر فورس الیکٹرانک وا ر فیئر اٹی کمکاری نا بارواٹی مفاہمت نا یات داشت و ملٹری ہیلتھ انا بشخ اٹی تربیت و کمکاری نا بابت پروٹوکول آ وزیردفاع خواجہ محمد آصف و ترک وزیر دفاع یوشارگلیر دستخط کریر۔ ہائیڈرو کاربن نا بشخ اٹی کمکاری نا معاہدہ ٹی ترمیم نا پروٹوکول، انرجی ٹرانزیشن نا بشخ اٹی کمکاری آ مفاہمت نا یات داشت و کانڑ کنی نا بشخ اٹی کمکاری آ مفاہمت نا یات داشت آ وزیر توانائی سردار اویس احمد خان لغاری و ترک وزیر توانائی و قدرتی وسیلہ الپر سلان بیر کتر دستخط کریر۔ مصنوعات نا واپار نا معاہدہ ءِ اپ گریڈ کننگ نا عزم آ اسیجائی وزارتی بیان و واپار اٹی کاریم اٹ اتوک آ اصل سرٹیفکیٹ آتا پک کننگ نا ڈیجیٹلائزیشن نا بابت مفاہمت نا یات داشت آ وزیر واپار جام کمال خان و ترک وزیر واپار عمربولت دستخط کریر۔ کشاری بج انا بشخ اٹی کمکاری نا معاہدہ و آبی بشخ اٹی کمکاری نامعاہدہ غا وزیر نیشنل فوڈ سیکورٹی اینڈ ریسرچ رانا تنویرحسین و ترک وزیر کشت وکشار و جنگلات ابراہیم یومکلی دستخط کریر۔ لیگل میٹرولوجی انفراسٹرکچر نا جوڑ کننگ نا بارواٹی مفاہمت نا یات داشت و پاکستان ۔ ترکیہ ٹیکسٹائل ٹیکنالوجی سینٹر نا تکنیکی کمکاری و شونداری کن سائنسی و تکنیکی ریسر چ کونسل ترکیہ اینڈ ٹیکنالوجی و نیشنل ٹیکسٹائل یونیورسٹی (این ٹی یو) فیصل آباد نا نیام اٹ مفاہمت نا یات داشت آوزیر تعلیم و کسبی تربیت ڈاکٹر خالد مقبول صدیقی و ترک صنعت و ٹیکنالوجی نا وزیر محمد فتح کاکر دستخط کریر۔ ایکسپورٹ کریڈٹ بینک آف ترکیہ و ایکسپورٹ امپورٹ بینک آف پاکستان نا نیام ات ایم او یو بارواٹی اعلامیہ غا پاکستان نا کنڈآن وزیرخزانہ محمد اورنگزیب و ترکیہ نا کنڈآن وزیر واپار عمر بولت دستخط کریر۔ صنعتی ملکیت آتا بشخ اٹی کمکاری آ مفاہمت نا یات داشت آ وزیر واپار جام کمال خان و ترک وزیر صنعت و ٹیکنالوجی محمدفتح کاکرا دستخط کریر۔ دینی خذمت و مذہبی تعلیم نا بشخ آتیٹی کمکاری نا بارواٹی مفاہمت نا یات داشت آ وزیر مذہبی امور و بین المذاہب ہم آہنگی چوہدری سالک حسین و مذہبی امور ترکیہ نا صدر پروفیسر ڈاکٹر علی ارباش دستخط کریر۔ حلال واپار اٹی کمکاری کن مفاہمت نا یات داشت آ وزیر سائنس و ٹیکنالوجی ڈاکٹر خالد مقبول صدیقی و ترک وزیر واپار عمر بولت دستخط کریر۔ مرکزی بینک آف ترکیہ (سی بی آرٹی )و اسٹیٹ بینک آف پاکستان (ایس بی پی) نا نیا م اٹ تکنیکی کمکاری نا بشخ اٹی مفاہمت نا یات داشت آ وزیرخزانہ محمد اورنگزیب و ترک وزیرخارجہ حقان فیدان دستخط کریر۔ وزارت حوالکاری و شینکاری نا بابت اِراایم اویوز طے مس۔ تعلقات عامہ و کمیونیکیشنز نا بشخ اٹی کمکاری نا بارواتی مفاہمت نا یات داشت و میڈیا و کمیونیکیشن نا بشخ اٹی کمکاری نا بارواٹی مفاہمت نا یات داشت آ وزیر حوالکاری و شینکاری عطاء اللہ تارڑ و ترکیہ نا کمیونیکیشنز نا ڈائریکٹر فخر الدین التون دستخط کریر۔ جان جوڑی و ادویہ سازی نا بشخ اٹی تکنیکی کمکاری نا بابت مفاہمت نا یات داشت آ وزیر نیشنل فوڈ سیکورٹی اینڈ ریسرچ رانا تنویرحسین و ترک وزیر خارجہ حقان فیدان دستخط کریر۔ ترکش ایرواسپیس انڈسٹریز و پاکستان نا نیول ریسرچ اینڈ ڈویلپمنٹ انسٹی ٹیوٹ نا نیام اٹ مفاہمت نا یات داشت آ ڈی جی این آرڈی آئی پاکستان نیوی ، ریئر ایڈمرل جاوید اقبال و ترک ایرواسپیس انڈسٹریز نا ڈی جی ڈاکٹر مہمت دیمیر اوغلو دستخط کریر۔ ترکیہ دفاعی صنعت نا سیکرٹریٹ و وزارت دفاعی پیدوار پاکستان نا نیام اٹ مفاہمت نا یات داشت آ وزیردفاع خواجہ محمد آصف و ترک سیکرٹری دفاعی صنعت ہالوک گورکن دستخط کریر۔ دودوربیدہ ئی کمکاری نا معاہدہ و آڈیو ویژول سروسز اٹی کوپروڈکشن نا بارواٹی معاہدہ غا وزیر قومی میرات و دودوربیدہ ڈویژن عطاء اللہ تارڑ و وزیرخارجہ حقان فیدان دستخط کریر۔ داکان بیدس پاکستان ترکیہ بزنس فورم نا نیام اٹ مفاہمت نا یات داشت آتیا ہم دستخط کننگا۔
