اسلام آباد۔ 13 فروری (اے پی پی ) پاکستان وترکیہ نا نیام اٹ پبلک ریلیشنز اینڈ کمیونیکیشنز ، میڈیا و کمیونیکیشنز ، دودوربیدہ ئی کمکاری و آڈیو وژول سروس آتا بشخ آتیٹی کمکاری کن مفاہمتی یات داشت ومعاہدہ طے مس۔ پنچ شنبے نادے آ پاکستان و ترکیہ نا نیام اٹ کمکاری نا مفاہمتی یات داشت و معاہدہ غاتیا دستخط آتا دود اٹی بنجائی وزیر حوالکاری و شینکاری عطاء اللہ تارڑ و ترکیہ نا ڈائریکٹر آف کمیونیکیشنز فخرالدین آلتن پبلک ریلیشنز اینڈ کمیونیکیشنز و میڈیا اینڈ کمیونیکیشنز نا بشخ آتیٹی کمکاری کن مفاہمت نا یات داشت آتیا تبادلہ کریر۔ ہندا وڑ بنجائی وزیر حوالکاری، شینکاری، قومی میرات و دودوربیدہ عطاء اللہ تارڑ و ترکیہ نا وزیر خارجہ امور حقان فیدان دودوربیدہ ئی کمکاری و آڈیو وژول سروس آتا بشخ آتیٹی معاہدہ غاتا تبادلہ کریر ۔ داوخت آ ترکیہ نا صدر رجب طیب اردوان و وزیراعظم محمد شہباز شریف ئسک ہم ساڑی ئسر۔
