اسلام آباد۔ 13 فروری (اے پی پی) بنجائی وزیر واپار جام کمال خان و ترک وزیر واپار پروفیسر ڈاکٹر عمربولت اسہ بڑزکو کہولی اوڑدہی اسے ٹی واپاری و زرکاری نا تعلقداری تے سوگو کننگ نا عزم انا درشانی ءِ کریر۔ وزارت واپار نا کنڈآن جاری اعلامیہ نا رداٹ بنجائی وزیر واپار جام کمال خان و ترک وزیر واپار پروفیسر ڈاکٹر عمر بولت پنچ شنبے نادے آ داڑے اوڑدہی کرے۔ داوخت آ ایلمی و تین پہ تینی کمکاری ءِ مو ن آ دننگ نا عزم انا درشانی ءِ کریر و فریق آک چندی بشخ آتیٹی ہڑتوم آکنڈآتا اقتصادی کمکاری ءِ ودفنگ نا قول ہم کریر۔ بنجائی وزیر واپار جام کمال خان ترک ڈل ءِ جم وجوش اٹ بخیرکرسا داہیت آ زور شاغا کہ پاکستان ترکی نا ’’ارٹ میکو اُرا‘‘ءِ۔ اوپوسکن آ اقتصادی وارخواہی پٹنگ نا اہمیت آ زور شاغا و دادورہ کن ترکیہ نا وزیر واپار تون اظہار تشکر کرسا دادورہ ءِ ہڑتوم آملک آتیکن اسہ تاریخی ءُ لمحہ اس گوندا۔ ترک وزیر واپار پروفیسر ڈاکٹر عمربولت جم وجوش اٹ بخیری آ منت واری نا درشانی ءِ کرسا اسلام آباد ءِ ’’اسلام نا شار‘‘ گوندا۔ اومستی پارے کہ دورہ ٹی، خذمت، سیل و سوات، تعلیم ، آئی ٹی ، دفاع و انفراسٹرکچر کون آاہم بشخ آتیٹی معاہدہ غاتیا دستخط کننگک، ہراڑآن ترکی و پاکستان نا نیام اٹ خڑکی و اسٹریٹجک شریداری نا پیدواری ءِ کیک۔ ہڑتوم آ وزیر آک ساڑی آ چیلنج آتون مون تننگ و ہڑتوم آملک آتا نیام اٹ پورو واپاری لائخی تے ملنگ کن اولیتی واپاری معاہدہ(پی ٹی اے) ءِ گچین کننگ نا گرج آ گپ وتران کریر۔ او باسک ملک آتا نیام اٹ واپار ءِ مون آ دننگ کن ڈی 8اولیتی واپاری معاہدہ ءِ بحال کننگ و سوگو کننگ نا گمان تیا ہم سجفیر۔ ترک وزیر واپار پروفیسر ڈاکٹر عمر بولت پارے کہ ترک زرکار پاکستان اٹی زرکاری ءِ ودفنگ نا خواہندار ءُ۔
