کوئٹہ۔ 13 فروری (اے پی پی) وزیراعلیٰ بلوچستان میر سرفراز بگٹی پارینے کہ بلوچستان نا طالب علم و ملازمت پیشہ زالبول آتے پوسکن آسفری آسراتی فراوان کننگ کن سیکوٹی اسکیم درستی راستی کرفنگ انگ ءِ ہرانا رداٹ مسن طالب علم آتے پنک سیکوٹی و مار طالب علم آتے الیکٹرانک بائیک فراوان کننگک، دا اسکیم آن لس بندغ ہم فائدہ ہرفنگ کیک ہراڑکن ضابطہ و وڑوڈول اس طے کننگ انگ ءِ، اسکیم نا مسخت ورناو زالبول آتے واکدار کننگ و اوفتا سفری ویل آتے ایسر کننگ ءِ۔ داخیال آتا درشانی ءِ او داڑے چیف منسٹر سیکرٹریٹ اٹی بڑزکو کہولی دیوان نا کماشی ءِ کرسا کرے ہراٹی اسکیم نا چندی پلو آتا جاچ ءِ ہلنگا۔ دیوان اٹی فیصلہ کننگا کہ دا اسکیم ءِ گچین و شفاف کننگ کن سیکرٹری فنانس بلوچستان نا کماشی ٹی خصوصی کمیٹی اس جوڑ کننگک ہراسیکوٹی و بائیک آتا فراوانی کن ضابطہ کار اس طے کیک۔ وزیراعلیٰ پارے کہ اسکیم نا رداٹ سبسڈی آ سیکوٹی فراوان کننگک تانکہ طالب علم و ملازمت پیشہ زالبول آتے ہن و براٹی آسراتی دوئی مرے، اسٹیٹ بینک انا سلابت و کمک اٹ بینک فنانسنگ نا آسراتی ہم فراوان کننگک تانکہ دا اسکیم ءِ عمل نا قابل و پائیدار کننگ مرے۔ اوپارت کرے کہ دا اسکیم بیرہ مار مسن تسکان محدود اف بلکن آسان شڑت آتیا لس بندغ کن ہم اوپن کننگے تانکہ صوبہ نا زیات آن زیات مخلوق دا پوسکن آ آسراتی آن فائدہ ہرفنگ کیر۔ وزیراعلیٰ جہانی یوم زالبول نا وخت آ پنک سیکوٹی اسکیم نا باضابطہ بنانا منظوری ءِ ترسا پارےکہ صوبہ نا زالبول آتے وتواجہ و واکدار ہُننگ خوانہ و دا گام اوفتا آجوئی و وتواجہی نا سمت اسہ مثبت پیش رفت اسے۔ دیوان اٹی ساڑی کمامدارآک وزیراعلیٰ نا دا گام انا ستاءِ کریر و داعزم انا درشانیءِ کریر کہ دا اسکیم ءِ زوت آن زوت عملی دروشم اس تننگک تانکہ بلوچستان نا ورناو زالبول آتے گچین سفری آسراتی دُوبننگ کے۔
