اسلام آباد۔12فروری (اے پی پی): مزن وزیر محمد شہباز شریف ءَ پائیدار دیمروئی ءِ واستہ ایٹمی ٹیکنالوجی ءَ را کارمرد کنگ ءِ وتی عزم ءِ یک رندے پدا گوشت کہ پاکستان ءَ ایٹمی توان ءِ پیداوار، صنعتی دیمروئی، طبی علاج، کشت ءُ کشاری، چاگردی ءُ اقتصادی دیمروئی ءِ تہ ءَ مزنیں پیشرفت کتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ آئی ءَ اے ھیالانی درشانی چار شمبے ءِ روچ ءَ مزن وزیر ایٹمی توانائی ادارگ ءِ ڈائریکٹر جنرل رافیل گروسی ءَ گوں گپ ءُ تران کنان ءَ کت انت۔ مزن وزیر ءَ موسمی مٹ مٹ ءَ را گر ءُ دار کنگ ءِ واستہ ایٹمی توان ءِ دیمروئی ءِ واستہ آئی اے ای اے ءِ گامگیج آناں ساڑات۔ آئی ءَ پائیدار دیمروئی ءِ واستہ ایٹمی ٹیکنالوجی ءِ کارمردی ءِ واستہ پاکستان ءِ عزم ءِ سر ءَ یک رندے پدا گوشت کہ کینسر ءِ نادراھی ءِ پٹ ءُ پول ءُ درمان، کشت ءُ کشاری، فوڈ سیکیورٹی، آپ ءِ بندوبست ءُ صنعت ءَ ھوار جتا جتائیں شوبگ آنی تہ ءَ ایٹمی ٹیکنالوجی ءِ پرامن کارمرد کنگ ءِ سر ءَ گپ ءُ تران کنگ بوت۔ آئی اے ای اے ءِ کمک ءَ چہ پاکستان ءَ ایٹمی توان ءِ پیداوار، صنعتی دیمروئی، جان سلامتی، کشت ءُ کشاری، چاگردی ءُ اقتصادی دیمروئی ءِ تہ ءَ مزنیں پیشرفت کتگ۔ آئی ءَ آئی اے ای اے ءِ گوما امن ءِ مول ءُ مراد ءِ واستہ ایٹمی ٹیکنالوجی ءِ سرجمیں توانائی آناں کارمرد کنگ ءِ واستہ پاکستان ءِ عزم ءِ پدا زور دات آئی اے ای اے ءِ ڈائریکٹر جنرل ءَ پاکستان ءِ دیریں کمک ءَ را ساڑات ءُ گوشت کہ آئی اے ای اے ھمے جذبہ ءِ تہ ءَ پاکستان ءِ گوما کار کنگ ءَ برجاہ دار ایت۔
