اسلام آباد۔ 12 فروری (اے پی پی) وزیراعظم محمد شہباز شریف پارینے کہ ملک میکرواقتصادی سوگوی آن پد شرح نموٹی ودکی نا کنڈآ ہِننگ ءِ، آئی ایم ایف نا منیجنگ ڈائریکٹر جوان وڑاٹ باندت آتے مون آ دننگ آ پاکستان نا اقتصادی ٹیم انا بھاز ستاءِ کرینے۔ زرراہی تس اٹی ریکارڈ ودکی حکومت آ سمندرپارپاکستانی تا پت انا ڈیک ءِ، انسانی اسمگلنگ نا مون انگا دھندہ نا مدامی کن خاتمہ ءِ کروئی مریک، سعودی عرب گچین برادر ملک و باپت آ سنگت ءِ، پاکستان سعودی عرب نا وتواجہی و جغرافیائی سالمیت آ اسُل آنچ بننگ کن اِلیپک، غزہ ٹی بدترین نسل کشی نا درور تاریخ اٹی ملیپک، ترکیہ نا صدر رجب طیب اردوان نا دورہ ٹی ہڑتوم آ کنڈآتا تعلقداری تے سوگو کننگ و واپار نا مون آ دننگ کن مفاہمت نا چندی یات داشت آتیا دستخط مریک۔ داخیال آتا درشانی ءِ او چارشنبے نادے آ داڑے بنجائی کابینہ نا دیوان آن تران کرساکرے۔ وزیراعظم پارے کہ ابوظہبی ٹی متحدہ عرب امارات نا صدر شیخ محمد بن زید النہیان تون ہڑتوم آ کنڈآتا تعلقداری و زرکاری تون اوار چندی امور تیا سرجمی اٹ گپ وتران مس، آرمی چیف جنرل سید عاصم منیر ہم اوڑدہی ٹی ساڑی ئس، دبئی ٹی ورلڈ گورنمنٹس سمٹ اٹی پاکستان نا نمائندگی ءِ کرے۔ داوخت آ دبئی نا فرمانروا، سری لنکا نا صدر ، کویت نا وزیراعظم و بوسنیا نا چیئرپرسن صدارت تون ہم اوڑدہی مس، پاکستان و سری لنکا نا تعلقداریک بے مٹ رہینگانو، ڈینگی نا دین انا مون ءِ توننگ ودرمان کن سری لنکا نا ڈاکٹرآک ننا پبی کمک ءِ کریسر، سری لنکا نا صدر ءِ پاکستان نا دورہ نا سلہ ءِ ہم خلکونن۔ وزیراعظم پارے کہ دبئی ٹی پاکستانی زرکارآتون اوڑدہی ٹی جوان سلاہ پیش کننگا، اوکاروبار اٹی آسانی ودی کننگ و کاروباری وزرکاری چاگڑد ءِ گچین کننگ نا گرج آ زور شاغا، ای اوفتے پاریٹ کہ پاکستان دے و نن خواری نا سوب آن میکرواکنامک سوگوی دوئی کرینے، داسہ ننا چکار شرح نمو ٹی ودکی آ ٹی ءِ، زرکارآتے پاکستان آ بننگ نا ہم سلہ خلکونن، اوفتا سلاہ تیا عمل کرسا کاروبار اٹی آسانی ودی کننگ کن گام گیج کننگک۔ وزیراعظم پارے کہ ڈی پی ورلڈ انا چیف ایگزیکٹیو آفیسر تون ہم اوڑدہی مس و او پاکستان اٹ زرکاری ءِ ودفنگ نا خواہندار ءِ، دبئی ٹی ورلڈ گورنمنٹس سمٹ آن تران اٹی، ای غزہ و فلسطین نامسلمان تا بابت پاکستان نا موقف ءِ پبی وڑاٹ دنیا نا مون آ پیش کریٹ، غزہ ٹی 50 ہزار آن زیات فلسطینی شہید مسنو، داکان بھلا بربریت و بدترین نسل کشی نا درور تاریخ اٹی ملیپک، داسہ جنگ بندی آن پد اومیت ءِ کہ ہموڑے امن مریک و فلسطینی تا بحالی کن گام گیج کننگک۔ وزیراعظم پارے کہ پاکستان سعودی عرب نا وتواجہی و جغرافیائی سالمیت کن مدام توار بڑزکرینے، سعودی عرب پاکستان نا گچین برادر ملک و باپت آ سنگت ءِ، پاکستان سعودی عرب نا وتواجہی و جغرافیائی سالمیت آ اسُل آنچ بننگ کن اِلیپک۔ وزیراعظم پارے کہ آئی ایم ایف نا منیجنگ ڈائریکٹر تون ہم دبئی ٹی اوڑدہی مس، ایم ڈی آئی ایم ایف جوان وڑاٹ باندات آتے مون آ دننگ آ وزیردفاع، وزیر بجلی ، وزیرخزانہ و اوفتا ٹیم انا بھاز ستاءِ کرے۔ جہانی مالیاتی ادارہ نا سروک نا سفتی آ ہیت آک ننکن بھاز است بڈ ءُ۔ اگہ نن تینا زرگزران ءِ شونداری تروئی ءِ و صنعت آتے مون آ دروئی ءِ تو داڑکن خواری کروئی مریک۔ وزیراعظم پارے کہ آئی ایم ایف نا منیجنگ ڈائریکٹر ءِ پارین کہ شونداری ہموتم مریک ہراتم پیدواری خڑچ اٹی کمتی بریک، ڈیوٹی تا نظام گچین مریک و توانائی نا نہاد اٹی کمتی بریک داڑآن ننا پیدوار ودک و نن دنیا نا ایلو ملک آتا مقابلہ ءِ ہم کننگ کینہ ہراڑآن ایم ڈی آئی ایم ایف جوان وڑاٹ امنا کرے و پارے کہ نم تینا پلان ءِ اتبو ببو نن اوڑآ سجفنہ، اوکان پد صوبہ غاتون اواری اٹ پلان نا تیاری آ کاریم نا بناءِ کننگ نا پارت کننگانے۔ وزیراعظم پارے کہ سمندر پارپاکستانی تے آسراتی تا فراوانی کن سنبرینگوک اُن، سمندر پار پاکستانی تا کنڈآن زرراہی تس اٹی ریکارڈ ودکی مسنے وجنوری ٹی زرراہی تس 3 ارب ڈالر رہینگانے، زرراہی تس اٹی ودکی سمندر پار پاکستانی تا حکومت آ پت انا ڈیک ءِ۔ وزیراعظم پارے کہ اوفتا لمہ و باوہ اوفتے کن اسہ ادارہ سے نا حیثیت تخاکہ و او مدام خواری و لگن اٹ کاریم کننگ و الس نا خذمت نا تلقین کریر۔ اوپارے کہ ننا خواری و لگن آن پاکستان اسہ عظیم ءُ ملک اس جوڑمریک و تینا نت تیا سلک۔ وزیراعظم پارے کہ ترکیہ نا صدر رجب طیب اردوان پاکستان نا اِرادے ئی دورہ ءِ کننگ ءِ، او اسلامی دنیا نا گچین انگا لیڈرءِ، اومدام پاکستان تون تفینے، ترکیہ نا صدر نا دورہ بھاز اہمیت تخک، اونا دورہ ٹی ہڑتوم آ کنڈآتا تعلقداری و واپار نا مون آدننگ نا بابت مفاہمت نا یات داشت آتیا دستخط مریک۔ وزیراعظم پارے کہ لیبیا ٹی شکست اٹی پاکستانیک ہم زوال کرینو، ننے اوڑآ بھاز است ہسونی ءِ ، وزیرداخلہ و انٹیلی جنس ایجنسیک انسانی اسمگلنگ نا بیخ کنی کن پورو وڑاٹ یکسوءُ، انسانی اسمگلنگ نا مون انگا دھندہ ءِ مدامی کن چٹفوئی مریک۔
