اسلام آباد۔ 12فروری (اے پی پی) وزیراعظم محمد شہباز شریف و آئی ایم ایف نا منیجنگ ڈائریکٹر کرسٹالیناجار جیوا پاکستان کن آئی ایم ایف پروگرام و حکومتی اصلاحات نا کمک اٹ دوئی مروک آ میکرواکنامک سوگوی آ گپ وتران کرینو وخت اس کہ آئی ایم ایف نا منیجنگ ڈائریکٹر آئی ایم ایف نا کمک اٹ چلینگوک آ پروگرام ءِ گچین وڑاٹ نافذ کننگ اٹ حکومت ءِ پاکستان نا کوشست آتا ستاءِ کرسا پارینے کہ ملکی زرگزران سوگوی آن پد شونداری نا کنڈآ ہِننگ ءِ۔ چارشنبے نادے آوزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف و جہانی مالیاتی فنڈ انا منیجنگ ڈائریکٹر کرسٹالیناجارجیوانا تدوک آ دے ورلڈ گورنمنٹس سمٹ 2025ء نا وخت آ دبئی ٹی اوڑدہی مس۔ اوڑدہی ٹی پاکستان نا برجاآئی ایم ایف پروگرام وحکومتی اصلاحات نا کمک اٹ دوئی مروک آمیکرواکنامک سوگوی آ گپ وتران کننگا۔ گپ وتران اٹی ادارہ جاتی اصلاحات نا نفاذ و مالیاتی نظم وضبط ءِ برقرار تخنگ کن پاکستان نا عزم ءِ تالان کننگا ہراکہ پاکستان نا زرگزرانی سوگوی نا بحالی و ملک اٹی پائیدار شونداری و آخبت کن اہم اہمیت تخک۔ وزیراعظم شہباز شریف آئی ایم ایف نا ودکی فنڈ سہولت نا رداٹ مروک آپیش رفت نا اہمیت ءِ تالان کرے، ہراپاکستان نا زرگزران ءِ سوگو و اودے مریس مدی بحالی نا کسر آ دننگ اٹ اہم کڑد اداکرے۔ وزیراعظم شہباز شریف اصلاحات نا رفتار خاص وڑاٹ خراج اصلاحات، توانائی نا بشخ انا گچین کارکڑد و نجی بشخ انا شونداری کون آاہم بشخ آتیٹی پیش رفت ءِ برقرارتخنگ کن حکومت نا عزم انا درشانی ءِ کرے۔ او منیجنگ ڈائریکٹر کرسٹالینا جارجیوا ءِ پاکستان نا زرگزرانی سوگوی نا لائحہ عمل ، گچین کارکڑد و ڈٹ بندی نا پائیداری کن حکومت نا عزم انا یقین ترفے ہرا پاکستان اٹ جوان و پائیدار شونداری نا دوئی کننگ کن اہم ءُ جزواسے۔ کرسٹالینا جارجیوا آئی ایم ایف نا کمک اٹ چلینگوک آ پروگرام ءِ گچین وڑاٹ نافذ کننگ اٹ حکومت ءِ پاکستان نا کوشست آتا ستاءِ کرسا پارے کہ ملکی زرگزران سوگوی آن پد شونداری نا کنڈآ ہِننگ تون اوار اوار پاکستان اٹ افراط زر اٹی کمتی اتون گچین کارکڑد نا درشانی ءِ کننگ اٹی ءِ۔ اوداہیت انا ہم اعتراف ءِ کرے کہ پاکستان زرگزرانی بحالی نا دوئی کننگ آ ن پد شونداری نا کنڈآ ہِننگ ءِ۔ آئی ایم ایف نا منیجنگ ڈائریکٹر ملک انا اصلاحاتی ایجنڈا غا عملدرآمد کن وزیراعظم شہباز شریف نا سرکڑدہ ئی و جندی عزم انا ہم ستاءِ کرے، ہراپاکستان نا زرگزرانی سوگوی و شونداری نا دوئی کننگ اٹ اہم کڑد اداکرے۔ آئی ایم ایف نا منیجنگ ڈائریکٹر مریس مدی زرگزرانی سوگوی ءِ پک کننگ کن پدریسہ مالیاتی نظم وضبط، ادارہ جاتی اصلاحات و گچین گورننس نا اہمیت آ زور شاغسا پاکستان نا اصلاحاتی ایجنڈا نا مخ تفی کن آئی ایم ایف نا عزم انا درشانی ءِ کرے۔
