مزن وزیر شہباز شریف ءَ کویت ءِ مزن وزیر شیخ احمد عبداللہ الاحمد الصباح ءَ گوں گند ءُ نند کت، دو نیمگی سیادی آنی جوانیں رفتار ءِ سر ءَ دل یکیمی ءِ درشان کت

دبئی۔11فروری  (اے پی پی): مزن وزیر محمد شہباز شریف ءُ کویت ءِ مزن وزیر شیخ احمد عبداللہ الاحمد الصباح ءَ دو نیمگی سیادی ءِ جوانیں رفتار ءِ سر ءَ دل یکیمی ءِ درشانی کت ءُ پاکستان ءُ کویت ءِ نیام ءَ یک مھکمیں اقتصادی کمک ءِ تہ ءَ گیش ءُ گیوار کنگ ءِ واستہ وتی عزم ءِ پدا زور دات۔ سئے شمبے ءِ روچ ءَ مزن وزیر ءِ کارگس ءِ پریس ونگ ءِ نیمگ ءَ چہ جاڑی بوتگیں نمدی ءِ تہ ءَ مزن وزیر محمد شہباز شریف ءَ دبئی ءَ جھان ءِ حکومتی سروک دیوان ءِ ساھت ءَ کویت ءِ مزن وزیر شیخ احمد عبداللہ الاحمد الصباح ءِ گوما دو نیمگی گند ءُ نند کتگ۔ دوئیں راہشون آں پاکستان ءُ کویت ءِ نیام ءَ براتیں سیادی ءِ سر ءَ چار ءُ تپاسی کت ءُ دو نیمگی سیادی ءِ جوانیں مومنٹم ءِ سر ءَ دل یکیمی ءِ درشان کت۔ ایشاں پاکستان ءُ کویت ءِ کمک ءَ را گیش وسعت دیگ ءُ استیں سیادی آناں وت مہ وتی فائدہ مندیں مھکمیں اقتصادی شریکداری ءِ تہ ءَ بدل کنگ ءِ واستہ وتی جزم ءِ پدا زور دات۔ دوئیں رہشون آں میاں اوستمانی ءُ جنوبی ایشیا ءِ جاور ھال ءَ ھوار وت مہ وتی دلپوشی ءِ دمگی ءُ میاں اوستمانی جیڈھ آنی سر ءَ ھیال ءُ لیکہ درشان کت۔ دوئیں راہشوناں غزہ ءَ جنگ بندی ءِ زوت ءُ سرجمی ءَ عملدرآمد کنگ ءُ فلسطینی الس ءَ را انسانی کمک ءِ ترند کنگ ءِ لوٹ کتگ۔