وزیراعظم شہباز شریف و بوسنیا اینڈ ہرزیگووینا نا چیئرپرسن صدارت نااوڑدہی، چندی بشخ آتیٹی ہڑتوم آ کنڈآتا تعلقداری تے پین مون آ دننگ آ امنا

دبئی ۔ 11 فروری (اے پی پی) وزیراعظم محمد شہباز شریف و بوسنیا اینڈ ہرزیگووینا نا چیئرپرسن صدارت زلجکا سیویجانووچ ہڑتوم آملک آتا نیام اٹ واپار و زرکاری تون اوار چندی بشخ آتیٹی ہڑتوم  آکنڈآتا تعلقداری تے پین مون آ دننگ کن رابطہ غاتے ودفنگ آ امنا کرینو۔ سے شنبے نادے آوزیراعظم میڈیا آفس آن جاری بیان نا رداٹ وزیراعظم محمد شہباز شریف نا بوسنیا اینڈ ہرزیگووینا نا چیئرپرسن صدارت تون ورلڈگورنمنٹس سمٹ نا وخت  آ اوڑدہی مس۔ اوڑدہی ٹی وزیراعظم بوسنیا و ہرزیگووینا تون پاکستان نا برادرانہ تعلقداری تا اہمیت ءِ تالان کرے۔ ہڑتوم آملک آتا نیام اٹ کمکاری آ است جمی نا درشانی ءِ کرسا وزیراعظم ہڑتوم آ کنڈآتا تعلقداری تے تین پہ تینی وڑاٹ فائدہ ئی واپاری و اقتصادی تعلقداری آ تالان اسہ سوگو و گیشتر البنداو شریداری ٹی بدل کننگ نا پاکستان نا است خواہی نا درشانی ءِ کرے۔ بوسنیااینڈ ہرزیگوینا نا یورپی یونین نا رکنیت کن نیک است خواہی نا درشانی ءِ کرسا وزیراعظم پارے کہ بوسنیا اینڈ ہرزیگوینا نا بطور علاقائی رابطہ غاتا مرکز نا بے پناہ لائخی و آخبت اٹ یورپی یونین نا رکنیت بوسنیا اینڈ ہرزیگوینا نا کسر پاکستانی گڑاتا بلقان و دے ٹکی یورپی منڈی تسکان رسینگ نا وارخواہی فراوان کیک۔ بوسنیا اینڈ ہرزیگوینا نا چیئرپرسن صدارت نیک است خواہی  تیا وزیراعظم نا منت واری ءِ ہرفسا بوسنیا و پاکستان نانیام اٹ چندی بشخ خاص کر واپار و زرکاری ٹی تعلقداری تے مون آ دننگ نااست خواہی نا درشانی ءِ کرے۔ ہڑتوم آ راہشونک پاکستان وبوسنیا اینڈ ہرزیگووینا نا نیام اٹ ہڑتوم آ کنڈآتا تعلقداری تا پین مون آدننگ کن اواری اٹ کاریم کننگ کن رابطہ غاتے پین سوگو کننگ آ امنا کریر۔