وزیراعظم نا سلہ غا ترکیہ نا صدر رجب طیب اردوان 12 فروری آن پاکستان نا مسہ دے ئی دورہ ءِ کیک، ترجمان دفترخارجہ

اسلام آباد۔ 11 فروری (اے  پی پی) وزیراعظم محمد شہباز شریف نا سلہ غا ترکیہ نا صدر رجب طیب اردوان 12آن 13 فروری اسکان پاکستان نا دورہ ءِ کیک، صدر اردوان تون اوار بڑزکو کہول انا ڈل ہم مریک ہراٹی وزیرآک و بڑزکو کمامدارآتیان بیدس کارپوریٹ راہشونک ہم اوار مریرہ۔ ترجمان دفترخارجہ نا کنڈآن سے شنبے نادے آ جاری بیان نا رداٹ دورہ ٹی وزیراعظم شہباز شریف و صدر اردوان پاک ترک بڑزکو کہولی اسٹریٹجک کوآپریشن کونسل نا ہفت می دیوان نا کماشی ءِ کیک۔ سیشن نا ایسر آ اسہ اسیجائی اعلامیہ و چندی اہم معاہدہ /ایم اویوتیا دستخط کننگ نا گمان ءِ۔ ہڑتوم آ راہشونک اسیجائی پریس کانفرنس اسے آن ہم تران کیرہ۔ صدر اردگان، وزیراعظم شہبا زشریف و صدر آصف علی زرداری تون ہم ہڑتوم آ کنڈآتیا اوڑدہی کیک۔ وزیراعظم شہباز شریف تون او پاکستان ترک بزنس اینڈ انویسٹمنٹ فورم آن تران کیک ہراٹی ہڑتوم آ کنڈآتا سرکڑدہ زرکار، کمپنی و کاروباری بندغ آک شریک مریرہ۔بیان نار داٹ ہائی لیول سٹریٹجک کوآپریشن کونسل فیصلہ سازی نا بڑزکو انگا فورم ءِ، ہراہڑتوم آملک آتا نیام اٹ ہڑتوم آکنڈآتا تعلقداری تے پین سوگو کننگ کن سٹریٹجک سمت فراوان کیک۔ ہائی لیول اسٹریٹجک کوآپریشنل کونسل نا رداٹ چندی اسیجائی قائمہ کمیٹیک ءُ، ہرافتے ٹی واپار، زرکاری، بینکنگ، فنانس، دودوربیدہ، سیل و سوات، توانائی ، دفاع ، کشت وکشار ، ٹرانسپورٹ ، مواصلات ، آئی ٹی ، جان جوڑی ، سائنس وٹیکنالوجی و تعلیم نا بشخ آک اوار ءُ۔ داتم اسکان ایچ ایل ایس سی سی نا شش دیوان اڈ ہلکنے۔ آخیریکو دیوان 13-14فروری 2020آ اسلام آباد اٹی مس۔ بیان نارداٹ پاکستان و ترکیہ تاریخی برادرانہ رشتہ غاتیٹی تفوک ءُ۔ ترک صدر نا دورہ و ہائی لیول سٹریٹجک کوآپریشن کونسل نا 7 می دیوان نا اڈتننگ ہڑتوم آملک آتا نیام اٹ برادرانہ تعلقداری تے پین گہراکننگ و کثیر جہتی کمکاری ءِ ودفنگ اٹ کمکار مریک۔