حکومت درملکی زرکارآتے آسودہی و کاروبار اٹی آسانی فراوان کننگ کن اولیتی گام گیج کننگ اٹی ءِ، وزیراعظم محمد شہباز شریف

دبئی۔ 11 فروری (اے پی پی) وزیراعظم محمد شہباز شریف پارینے کہ پاکستان اٹی چندی بشخ آتیٹی زرکاری نا گیشتر وارخواہی ارے، حکومت درملکی زرکارآتے آسراتی و کاروباراٹی آسانی فراوان کننگ کن اولیتی گام گیج کننگ اٹی ءِ۔ وزیراعظم آفس نا میڈیا ونگ آن جاری بیان نا رداٹ او داخیال آتا درشانی ءِ پنی آ امریکی کاروباری شخصیت و زرکارجینٹری بیچ تون گپ وتران کرساکرے ہرا سے شنبے نادے آ داڑے اوڑتون اوڑدہی کرے۔ وزیراعظم پارے کہ حکومت پیشن نا زرکارآتے آسراتی و کاروبار اٹی آسانی کن اولیتی بنداو تیا گام گیج کننگ اٹی ءِ۔ درملکی زرکارآتے پاکستان اٹ ساڑی آ زرکاری نا وارخواہی تیان فائدہ ہرفنگ کن دا جوان انگا وخت ءِ۔ وزیراعظم پارے کہ حکومت نا پالیسی تا سوب آن شرح سود کم مننگ آن کاروباراٹی آسودہی و روزگار نا پوسکن ءُ وارخواہی ودی مسنے۔ امریکہ وپاکستان نا نیام اٹ دہائی تیا تالان تعلقداری ءِ، ہڑتوم آملک آتا نیام اٹ واپار و زرکاری نا مون آدننگ کن سنبرینگوک اُن۔ جینٹری بیچ وزیراعظم نا کماشی ٹی پاکستان نا زرگزرانی سوگوی ناستاءِ کرے۔ جینٹری بیچ تینا ساڑی آ دورہ ءِ پاکستان نا ذکر ءِ کرسا حکومت نا پالیسی تے کاروبار و زرکاری کن جوان گوندا و چندی بشخ آتیٹی زرکاری ٹی بھاز است خواہی تخنگ نا درشانی ءِ کرے۔ جینٹری بیچ پارے کہ او پاکستان اٹی تینا زرکاری نا ڈٹ آتیا زوت عملدرآمد نا خواہندار ءِ۔