پاکستان خصوصی زرکاری سہولت کونسل نا کمک اٹ زرکاری نا وڑوڈول آتے پین آسان و جم کاروباری چاگڑد ءِ گچین کرینے، وزیراعظم شہباز شریف

دبئی۔ 11 فروری (اے پی پی) وزیراعظم محمد شہباز شریف پارینے کہ پاکستان خصوصی زرکاری سہولت کونسل نا کمک اٹ زرکاری نا وڑوڈول آتے پین آسان و جم کاروباری چاگڑد ءِ گچین کرینے وشفافیت ءِ مون آ درینے، ڈی پی ورلڈ اتون بامعنی زرکاری نا شریداری اٹ پاکستان و متحدہ عرب امارات نا واپاری تعلقداری تے سوگو کننگ اٹ کمک رسینگک۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون ورلڈ گورنمنٹس سمٹ نا وخت آ ڈی پی ورلڈ انا گروپ چیئرمین و سی ای او سلطان احمد بن سلیم داڑے اوڑدہی کرے۔ داوخت آ وزیراعظم ڈی پی ورلڈ انا ڈل انا پاکستان نا ساڑی آ سرسہب دورہ نا ستاءِ کرساپارے کہ دادورہ پاکستان و ڈی پی ورلڈ انا نیام اٹ بامعنی زرکاری نا شریداری نا سوب مس ہرا ستاکڑزوک ءُ ہیت اسے۔ اوداہیت آ زور شاغا کہ داوڑنا سرجزو کمکاری اٹ پاکستان ومتحدہ عرب امارات نا نیام اٹ واپاری تعلقداری تے سوگو کننگ اٹ کمک رسینگک۔ وزیراعظم محمد شہباز شریف پاکستان اٹی ڈی پی ورلڈ نا زرکاری ناستاءِ کرسا واپار و لاجسٹک انفراسٹرکچر ءِ ودفنگ اٹ اونا کڑدانا ستاءِ کرے۔ اوڈی پی ورلڈ اتون بین الحکومتی معاہدہ غاتا رداٹ ڈٹ آتا زوت پوروی کن پاکستان نا عزم انا درشانی ءِ کرے۔ اوپارےکہ خصوصی زرکاری سہولت کونسل (ایس آئی ایف سی) نا کمک اٹ پاکستان زرکاری نا وڑوڈول ءِ پین آسان ، شفافیت ءِ مون آ دننگ و جم کاروباری چاگڑد ءِ گچین کرینے، ہراڑآن پاکستان جہانی زرکارآتیکن اسہ پرکشش ءُ ہند اس جوڑ مسنے۔ وزیراعظم ڈی پی ورلڈ انا وژن و کاروباری حکمت عملی نا ستاءِ کرے ہرا پاکستان نا زرگزرانی است خواہی تتون ہم گرنچ ءِ۔ اوپارے کہ پاکستان نا سٹریٹجک محل و وقوع ڈی پی ورلڈ اکن تینا آپریشن تے ودفنگ و پاکستان اٹ جبل علی بندرگاہ کون آسرسہب ڈٹ آتا تقلید نا اسہ بے مٹ ءُ موقع اس فراوان کیک۔ ڈی پی ورلڈ گروپ نا چیئرمین تین پہ تینی کمکاری ءِ مون آ دننگ اٹ حکومت پاکستان نا پدریسہ مخ تفی آ وزیراعظم نا منت واری ءِ ہرفے۔ اوڈی پی ورلڈ انا ڈٹ آتا وخت آ پوروی ءِ پک کننگ و کمکاری نا پوسکن ءُ کسر پٹنگ نا عزم انا درشانی ءِ کرے۔ اوڑدہی ٹی ڈی پی ورلڈ انا چیئرمین وزیراعظم ءِ پارے کہ پاکستانی مصنوعات آتا متحدہ عرب امارات اٹی برآمد آتا مون آ دننگ کن ڈی پی ورلڈ اسہ خصوصی نمائشی ہال اس جتا کرینے ہرانا سوب آن اماراتی مارکیٹ اسکان پاکستانی مصنوعات آتا رسینگ و اوفتا تشہیر نا وارخواہی دوئی مریک۔ وزیراعظم ڈی پی ورلڈ انا دا گام انا ستاءِ کرے۔