مزن وزیر محمد شہباز شریف ءُ بوسنیا اینڈ ہرزیگوویناءِ صدارت ءِ چئیرپرسن ءِ گندءُ نند، بازیں پڑآں دونیمگی سیادی ءَ را گیش کنگءِ سرءَ تپاک

دبئی۔11فروری  (اے پی پی) : مزن وزیر محمد شہباز شریف ءُ بوسنیا اینڈہرزیگووینا ءِ  صدارت ءِ چیئرپرسن زلجکا سیو یجانووچ ءَ دوئیں ملک آنی نیام ءَ بیپار ءُ زرکاری ءَ ہوار بازیں پڑآں دونیمگی سیادی ءَ را گیش کنگءِ سرءَ تپاک کتگ۔ سئے شمبے ءِ روچءَ مزن وزیر میڈیا کارگس ءَ چہ شنگ بوتگیں بیان ءِ ردءَ مزن وزیر محمد شہباز شریف ءِ بوسنیا اینڈ ہرزیگووینا ءِ صدارتی چیئرپرسن ءَ گوں ورلڈگورنمنٹس سمٹ ءِ موھءَ گندءُ نند بوتگ۔ گندءُ نندءِ تہا مزن وزیر ءَ  بوسنیا ءُ ہرزیگووینا ءِ گوما پاکستان ءِ براتیں سیادی ءِ ارزشت ءَ را پدر کتگ۔  دوئیں ملک آنی نیام ءَ کمک ءِ سر ءَ دل یکیمی ءِ درشان کنان ءَ مزن وزیر ءَ پاکستان ءِ واھشت ءِ درشان کت کہ دو نیمگی سیادی ءَ را یک مھکمیں ءُ پراھ ءُ شاھگانیں بنیات ءِ شریکداری ءِ تہ ءَ بدل کنگ بہ بیت کہ ایشی ءِ بنیات وت مہ وتی بیپار ءُ اقتصادی سیادی آنی سر ءَ اِنت۔ بوسنیا ءُ ہرزیگووینا ءِ یورپی یونین ءِ باسک بوھگ ءِ واستہ وتی نیکیں واھشت آنی درشان کنان ءَ مزن وزیر ءَ گوشت کہ بوسنیا ءُ ہرزیگووینا ءِ دمگی رابطہ ءُ یورپی یونین ءِ آیوکیں باسک بوھگ ءِ مرکز ءِ بستار ءَ بے دروریں توانائی ءِ سبب ءَ پاکستانی سامان آناں بلقان ءُ ہرزیگووینا ءِ مارکیٹ ءَ را مشرقی یورپ ءِ وسیلگ ءَ سر بوھگ ءِ موہ رس ایت۔بوسنیا ءُ ہرزیگووینا ءِ صدارت ءِ چیئرمین ءَ مزن وزیر ءِ نیکیں واھشت آنی سر ءَ منت گپت ءُ بوسنیا ءُ پاکستان ءِ نیام ءَ جتا جتائیں شوبگ ھاسیں رنگ ءَ تجارت ءُ سرمایہ کاری ءِ تہ ءَ سیادی ءَ را دیمروئی دیگ ءِ واھشت ءِ درشان کت۔ دوئیں رہشون آں پاکستان ءُبوسنیاءُ ہرزیگووینا ءِ نیام ءَ دو نیمگی سیادی ءَ را گیش دیمروئی دیگ ءِ واستہ یکجائی ءَ کار کنگ ءِ واستہ سیادی ءَ را گیش مھکم کنگ ءِ سر ءَ تپاک کت۔