اقوام متحدہ ۔ 10 فروری (اے پی پی) اقوام متحدہ ٹی پاکستان نا سفیر منیر اکرم یک شنبے نادے آنمیبیا نا اولیکو صدر سام نوجومانا کزیت آ ہڑزخواہی نا درشانی ءِ کرسا اودے ’’جیرت مند‘‘راہشون گوندا۔ سام نوجومانمیبیا نا دارالحکومت ونڈہوک اٹی تدوک آ دے 95 سال انا وئی ٹی بھلو وخت اسے نا ناجوڑی آن پد کزیت کریسس۔ پاکستانی مندوب تینا نمیبیا نا ہم منصب نیویل گرٹزےنا پن ہڑزخواہی کلہواٹی پارے کہ مسکوہی صدر سام نوجومانانمیبیانا الس کن مشکل آتون مون ترسا خودارادیت و آجوئی نا دوئی کننگ اٹ جیرت مندانہ و اہم کڑد نوآبادیات نا تاریخ اٹی اسہ روشناءُ بشخ اس سلک۔ اوآجوئی و حق خودارادیت کن جہد کروک آتیکن اسہ متاثرکن دروراس قائم کرینے۔ پاکستانی مندوب پارے کہ ای خوش بخت اُٹ کہ صدر سام نوجوماتون ہمووخت آ اوڑدہی مس ہرا تم او نمبیانا آجوئی کن اقوام متحدہ ٹی سخت کوشست کریکہ۔ اواونا خاہوت و نمیبیانا قوم اتون ہڑزخواہی کرے۔ سام نوجوما1990ٹی نمیبیانا صدر جوڑ مس و 2005اسکان داعہدہ غا رہینگا۔
