اسلام آباد۔ 10 فروری (اے پی پی) وزارت مذہبی امور نا ترجمان پارینے کہ حج 2025نا حاجی تا تربیت کن ہیلکاری ورکشاپ نااڈتننگ جوانی اٹ برجاءِ، حج تربیت نا ارٹ میکو ریسہ روچہ مبارک آن پد بناکیک ہرا آخیریکو حج جہاز اسکان برجاسلک۔دوشنبے نادے آ وزارت مذہبی امور نا ترجمان اےپی پی ءِ پارے کہ تدوک آ منہ دے اٹی اسلا م آباد، ملتان تون اوار ملک انا ایلو بشخ آتیٹی حج ہیلکاری ورکشاپ اس اڈتننگا ہراٹی حاجیک بشخ ہلکر۔ ہیلکاری ورکشاپ اٹی حاجی تے مناسک حج انا اداکننگ، سعودی عرب اٹی اڈ کننگ ہموجاگہ نا کانود و اصول و ضابطہ غاتون اوار ایلو امورتیا سرجمی اٹ معلومدار کننگا۔ اوپارے کہ ہرحاجی ءِ تینا تربیت نا شیڈول نا رداٹ تعلقدار ہند آتیا ہنسا تربیت دوئی کننگ کانودی خواست ءِ۔ اوپارے کہ نجی حج اسکیم نا بکنگ نا ہم آخیریکو منہ دے رہینگانے۔ غٹ پرائیویٹ حج کمپنی تے 12 فروری اسکان بکنگ پورو کننگ نا پارت کننگانے۔ نجی حاجی وزارت نا ویب سائٹ یا پاک حج موبائل ایپ آن مستند حج منظم کمپنی تے پک کننگ کیرہ۔
