بنجاھی وزیر برائے تجارت ءَ سعودی کاروباری حکام ءَ گوں گند ءُ نند کت، پاکستان ءَ سعودی برانڈز ءِ کاروباری   ءَ را شاھیگان کنگ  ءِ بابت ءَ گپ ءُ تران

اسلام آباد/جدہ۔8فروری  (اے پی پی): بنجاھی وزیر تجارت جام کمال خان ءَ سعودی عرب ءِ مزنیں ءُ ھاسیں کاروباری ادارگ آنی کارندہ آں گوں گند ءُ نند کتگ ءُ دوئیں ملک آنی نیام ءَ کاروباری کمک، سرمایہ کاری ءِ موہ ءُ پاکستان ءَ سعودی برانڈز ءِ کاروبار ءِ تہ ءَ گیشی ءِ بابت ءَ گپ ءُ تران کتگ۔ وزارت تجارت ءِ نیمگ ءَ چہ جاڑی بوتگیں پریس ریلیز ءِ رد ءَ جدہ ءَ اولی ’’میڈ ان پاکستان‘‘ ءِ نمائش ءِ موہ ءَ برجم داشتگیں دیوان آنی تہ ءَ بنجاھی وزیر برائے تجارت ءَ سعودی عرب ءِ مزنیں ءُ ھاسیں کاروباری ادارگ آناں پاکستان ءِ جتا جتائیں شوبگ آنی تہ ءَ سرمایہ کاری ءِ دعوت داتگ کہ ایشی ءِ تہ ءَ توانائی، کشت ءُ کشاری، آئی ٹی ءُ جان سلامتی ءِ تہ ءَ صارف آنی تہ ءَ گیشی بوتگ۔ درسد ءِ سرا ءُ 700 ملین ڈالر ءَ سر بوتگ انت۔ آئی ءَ سعودی سرمایہ کار آناں دل یکیمی دات کہ پاکستان ءَ سازگاریں کاروباری ماحول است انت، ٹیکس ءِ تہ ءَ چھوٹ، سرمایہ کار آنی رکھینگ ءِ کانود ءُ 240ملین ءَ چہ گیش صارفین ءِ مزنیں مارکیٹ ءَ را رسائی است انت۔ فوڈ-اگ، ٹیکسپو ءُ ہیلتھ کیئر اینڈ منرل شو ءِ وڑیں نامداریں تجارتی نمائش آنی تہ ءَ بھر زوری کنگ ءَ جام کمال خان ءَ پاکستان سنگل ونڈو (پی ایس ڈبلیو) ءُ نیشنل کمپلائنس سینٹر ءِ ھم ھاسیں ذکر کتگ، پاکستان ءَ کاروبار کنگ ءَ را آسان جوڑ کنگ ءِ گامگیج آنی تہ ءَ گیشی آورتگ۔ بنجاھی وزیر ءِ گند ءُ نند گوں رامی ابو غزالہ ، البیک ءِ مالک ءَ ۔ بنجاھی وزیر جام کمال خان ءَ را البیک ءِ کاروائی آنی ھاسیں تر ءُ تاب دیگ بوت کہ اودا آئی ءَ پاکستانی کارندہ آں گوں ھم گند ءُ نند کت ایشی ءِ تہ ءَ البیک ءِ پاکستان ءَ دیمروئی ءِ ھوالگ ءَ گپ ءُ تران کنگ بوت، ایشی ءِ ساھت ءَ کمپنی ءَ اے گپ ءِ پدرائی کت کہ آ زوت پاکستان ءَ وتی شاخ پچ کنگ ءَ انت۔ البک ءِ مالک ءَ گوشت کہ اے معاہدہ گڈی پڑ آنی تہ ءَ داخل بوتگ ءُ زوت پاکستانی صارف آناں کوالٹی فاسٹ فوڈ ءِ پجارینگ بیت بنجاھی وزیر ءَ البک ءَ کار کنوکیں پاکستانی کارندہ آنی ھزمت آناں ساڑاتگ ءُ پاکستان ءَ اے برانڈ ءِ بندات کنگ ءَ را وش اتک کتگ۔ آئی ءَ امیت سہرا کت کہ ایشی ءَ چہ نہ ایوک ءَ روزگار ءِ موہ پیداک بنت بلکینگ ءَ پاکستان ءِ فاسٹ فوڈ سیکٹر ءَ جوانیں بدلی آرگ بیت۔ بنجاھی وزیر تجارت جام کمال خان ءَ جدہ ءَ جاہ منندیں پاکستانی سرمایہ کار ءُ کاروباری مردم آنی گوما ھم گند ءُ نند کتگ ءُ سعودی عرب ءِ معیشت ءِ تہ ءَ آھانی دہائی آنی کرد ءِ توسیپ کتگ۔ آئی ءَ گوشت کہ گوستگیں پنچ سال آنی تہ ءَ 1.7ملین پاکستانی سعودی عرب ءَ تر ءُ تاب کتگ کہ اے پاکستانی درملک آنی واستہ گیشتریں پسندیدہ ملک جوڑ بوتگ آئی ءَ اے گپ ءِ ھم ذکر کت کہ گوستگیں مالی سال ءِ تہ ءَ پاکستان ءَ را سعودی عرب ءَ چہ 7.4ارب ڈالر ءِ زرّ ءِ دیم دیگ بوتگ کہ ایشی ءَ چہ دوئیں ملک آنی نیام ءَ مھکمیں مالی سیادی ءِ درشانی کنگ بوتگ۔ آئی ءَ جدہ ءَ بنجاہی پاکستان سرمایہ کار فورم ءِ کرد ءِ سر ءَ ھم زور پر دات کہ آ پاکستانی سرمایہ کار آناں رھشونی کنگ ءُ سعودی کاروباری براتی ءِ گوما سیادی ءَ را گیش کنگ ءِ تہ ءَ ھاسیں کرد پیلو کنگ ءَ اِنت۔ جدہ ءَ بوتگیں گپ ءُ تران پاکستان ءُ سعودی عرب ءِ نیام ءَ اقتصادی کمک ءِ نوکیں دور ءِ بندات ثابت بوھگ ءَ انت۔ سعودی کاروباری مردمانی پاکستان ءَ سرمایہ کاری ءِ گیش بوھوکیں رجحان، تجارتی حجم ءِ گیش بوھگ ءُ نوکیں کاروباری شریکداری اے سیادی ءِ گیشیں وسعت ءِ نشانی انت کہ البیک ءِ وڑیں مزنیں سعودی برانڈز ءِ پاکستان ءَ آیگ ءُ سعودی سرمایہ کارانی گیش بوھوکیں دلچسپی ءَ چہ پاکستان ءِ معیشت ءَ مزنیں کساسے ءَ گہتری کیت ءُ نوکیں تجارتی موہ پچ بنت۔