اسلام آباد۔8فروری (اے پی پی): مزن وزیر شہباز شریف ءَ گوشت کہ یک سال ءَ چہ حکومت ءِ اقتصادی ٹیم ءِ روچ پہ روچ محنت ءِ سبب ءَ راجی معیشت ءَ را استحکام رستگ ءُ ملک دیمروئی ءِ سفر ءَ انت ءُ یک سال ءِ تہ ءَ پاکستان ءِ سفر ءَ را یک مزنیں ملکے ءِ جوڑ کنگ انت۔ شمبے ءِ روچ ءَ ’’تعمیر ءُ دیمروئی ءِ روچ‘‘ ءِ درگت ءَ مراگش ءَ گوں تران کنان ءَ آئی ءَ گوشت کہ حکومت ءَ گوستگیں سال ءِ ستمبر ءَ آئی ایم ایف ءَ گوں 7ارب ڈالر ءِ سئے سالی پروگرام ءِ رکھینگ ءِ واستہ سوبمندیں رنگ ءَ گپ ءُ تران کتگ ات ایشی ءَ چہ ملک ءَ را ڈیفالٹ ءَ چہ رکینتگ ات۔ آئی ءَ گوشت کہ آئی ایم ایف ءِ سختیں جاور آنی سبب ءَ راج ءَ را چیلنج آنی دیم ءَ انت بلے آئی ءَ اے گپ ءِ سر ءَ زور پر دات کہ معیشت نوں مھکم بوتگ، برجمیں دیمروئی ءُ دیمروئی ءِ نیمگ ءَ روگ ءِ واستہ تیار انت۔ آئی ءَ گوشت کہ ما سرپد ایں کہ تنخواہ داریں تبک ءَ کل ءَ 300ارب کلدار ٹیکس داتگ کہ اے ھاسیں شگر ءُ منت ءِ لائق اِنت۔ مزن وزیر ءَ گوشت کہ جنوری 2025 ءَ مہنگائی ءِ شرح 40درسد ءَ چہ کم کنگ بوتگ ایشی ءِ سبب ءَ پالیسی ءِ شرح ءَ کمی بوتگ۔ آئی ءَ کاروباری براتی ءَ را زور پر دات کہ آ معیشت ءِ برجائی ءِ واستہ حکومت ءِ کوشست آناں کمک بہ کن اَنت ءُ اے گپ ءِ سر ءَ زور پر دات کہ آھانی ھوار بوھگ سک باز المی اِنت۔ آئی ءَ دل یکیمی دات کہ حکومت کاروباری برات ءَ را پالیسی جوڑ کنگ ءِ عمل ءَ سرجمی ءَ ہوار کنت پرچا کہ اقتصادی دیمروئی ءَ را جندی شوبگ ءَ گوں مشورہ کنگ ءَ ابید بوت نہ کنت۔ آئی ءَ اے گپ ءِ سر ءَ زور پر دات کہ حکومت سیم سر ءَ چہ دیم ءَ قاچاق ءِ گر ءُ دار ءِ واستہ زبردستی کار کنگ ءَ اِنت۔ مزن وزیر ئَ گوشت کہ کانودی رنگ ئَ اوگانستان ئَ شکر برآمد کنگ ئَ چہ حکومت ئَ 211ملین ڈالر زر کمائینتگ اگاں نہ اے ارزشتی ایں آمدنی اسمگلر آنی دست ئَ شتگ ات۔ آئی ءَ سرجمیں ملک ءَ اسمگلنگ ءِ کار آناں گر ءُ دار کنگ ءَ کمک کنگ ءَ پاک اُرد ءُ کانود نافذ کنوکیں ادارگ آنی سنگین ءُ دلجمیں کوشست آناں ساڑات۔ حکومت ءِ نجکاری پالیسی ءِ ھوالگ ءَ مزن وزیر ءَ گوشت کہ نوں ما مزنیں کچ ءُ کساس ءَ نجکاری ءِ کار ءِ نیمگ ءَ روگ ءَ ایں پرچا کہ کاروباری چست ءُ ایر آنی تہ ءَ حکومت ءِ ھچ کرد نیست۔ ناشرکاری ءِ ریشگ ءَ چہ کشگ ءَ ابید ملک دیمروئی ءُ وشھالی ءِ مکسداں پیلو کنگ نہ بیت ۔ آئی ءَ گوشت کہ ملک ءَ را امن، برجائی، یکوئی، وشھالی ءُ اقتصادی دیمروئی ءِ ضلورت اِنت، ایشی ءِ واستہ چاگرد ءِ توامیں تبک ءِ مردم آناں یکجائی ءَ کار کنگی اِنت۔ مزن وزیر ءَ گوشت کہ آ وتی پد ءَ یک انچیں میراثے یلہ کنگ لوٹ ایت کہ ملک ءَ را برجمیں دیمروئی ءِ کشک ءَ ایر بہ کنت۔ آئی ءَ اے گپ ءِ سر ءَ ھم دل یکیمی ءِ درشان کت کہ حکومت ءِ انوگیں وھد ءَ بندات کتگیں “اُدان پاکستان” پروگرام سوبمند بیت ءُ وتی ایر کتگیں درستیں مول ءُ مراد آناں سرجم کنت۔ اے موہ ءِ سر ءَ بنجاھی وزیر ھزانگ سینیٹر محمد اورنگزیب ءَ گوشت کہ استیں حکومت ءِ عقلمندیں پالیشی مہنگائی ءِ شرح ءَ را 40درسد ءَ چہ 2.4درسد ءَ کم کنگ ءَ سوبمند بوتگ انت۔ دیمترا پالیسی ءِ شرح 12% ءَ کم کنگ بوتگ کہ ایشی ءَ چہ حکومت ءِ سر ءَ قرضہ ءِ ادا کنگ ءِ بار کم بوتگ۔ آئی ءَ اے گپ ءِ سر ءَ زور پر دات کہ ملک ءِ راجدپتر ءَ اولی رند ءَ حکومت ءِ نیمگ ءَ چہ ڈھانچہ ءِ اصلاحات، رائٹ سائزنگ ءُ پنشن ءِ اصلاحات ءِ سر ءَ سک باز عمل کنگ بوھگ ءَ اِنت۔ منصوبگ بندی ءِ بنجاھی وزیر احسن اقبال ءَ وتی وش اتکی گشتانک ءَ گوشت کہ پالیسی آنی یکوئی ءُ تسلسل ءِ نہ بوھگ ءِ سبب ءَ پاکستان ءِ معیشت خطہ ءَ پد منتگ بوتگ۔ آئی ءَ دل یکیمی ءِ درشان کت کہ اودان پاکستان پروگرام ءِ چیر دستی ءَ پاکستان پنچسال ءِ تہا 100ارب ڈالر ءِ برآمدات ءِ ٹارگٹ ءَ سرجم کنت۔ آئی ءَ گوشت کہ اے مول ءُ مراد ءِ سرجم کنگ ءِ واستہ برآمدات ءِ سر ءَ مبنی صنعت ءَ را شپ ءُ روچ کار کنگ لوٹ ایت۔ آئی ءَ برآمداتی صنعت ءَ را راجی روچ آنی تہ ءَ چہ مستثنیٰ کنگ ءِ ھم تجویز پیش کتگ۔ بنجاھی وزیر ءِ اھوالکاری عطا اللہ تارڑ ءَ گوشت کہ مزن وزیر ءَ ملک ءِ واستہ وتی سیاست قربان کتگ ۔ آئی ءَ گوشت کہ کاروباری برات ءَ ملک ءِ دیمروئی ءِ سفر ءَ مدام حکومت ءِ کمک کتگ اے موہ ءِ سر ءَ تران کنان ءَ فیڈریشن آف کامرس اینڈ انڈسٹریز ءِ صدر عاطف اکرام شیخ ءَ گوشت کہ مزن وزیر محمد شہباز شریف ءِ دانشمندیں سروکی ءِ سبب ءَ سرمایہ کار ءِ تہ ءَ گہتری آرگ بوھگ ءَ اِنت۔ ملک ءِ دیمروئی ءِ واب ءَ پیلو کن اَنت، کاروباری چاگرد حکومت ءِ اقتصادی گامگیج آنی ستا ءَ کنت۔ مراگش ءَ گشتانک دیان ءَ نیشنل یوتھ کونسل ءِ باسک بلقیس وردگ ءُ اریج یاسینزئی ءَ ورنا آنی استعداد آنی سہرا کنگ ءِ واستہ حکومتی گامگیج آناں ساڑات۔ ڈینش گرلز اسکول چیشتیان ءِ یک زبردستیں گریجویٹ نورول عین ءُ انجینئر عادل حسین ءَ ہم گپ جت ءُ شریکیں مردماں وتی سوبمندی ءِ کسہ گشت انت۔
