جدہ۔ 07 فروری (اے پی پی) بنجائی وزیر واپار جام کمال خان اسلامی کمکار تنظیم نا سیکرٹری جنرل حسین ابراہیم طحہٰ تون جدہ ٹی اوڑدہی کرے، اوڑدہی ٹی اوآئی سی باسک ملک آتا نیام اٹ اقتصادی، واپاری و شونداری کمکاری ءِ مون آ دننگ نا گمان تیا گپ وتران کننگا۔ جمعہ نادے آ وزارت نا جاری بیان نا رداٹ اوڑدہی ٹی بنجائی وزیر اوآئی سی تون پاکستان نا گہرا رابطہ غاتا عزم انا درشانی ءِ کرے وپارے کہ مسلم دنیا ٹی اقتصادی و اسٹریٹجک تعلقداری تے سوگو کننگ کن بڑزکو کہول انا اوڑدہی بھاز اہم ءِ۔ اوپاکستان نا وزیراعظم نا کنڈآن اوآئی سی سیکرٹری جنرل نا منت واری ءِ ہرفے کہ او 11-12جنوری 2025 آ اسلام آباد اٹی اڈ ہلوک مسلم کمیونٹی تیٹی مسن تا تعلیم آ جہانی کانفرنس اٹی بشخ ہلکوسس۔ بنجائی وزیر واپار اوآئی سی نا زالبول آتا حق انا مون آ دننگ کن کروک آ کوشست آتا ستاءِکرے۔ وزیر واپار اوآئی سی ملک آتا نیام اٹ اقتصادی و واپاری رابطہ غاتا اہمیت آ زور شاغسا پارینے کہ دا شونہالی و سوگوی نا مون آ دننگ اٹ ہم کڑد ادا کیک۔ اواوآئی سی نا سیکرٹری جنرل نا سرکڑدہ ئی نا ستاءِ کرسا پارے کہ اونا چاری گری ٹی کروک آ گام گیج آتیان باسک ملک آتا نیام اٹ واپاری کمکاری ٹی نمان ودکی مننگ ءِ۔ وزیر واپار جام کمال خان او آئی سی نا سیکرٹری جنرل ءِ جدہ انٹرنیشنل ایگزیبیشن اینڈ کنونشن سینٹر اٹی برجا’’میڈاِن پاکستان‘‘ نمائش نا دورہ ءِ کننگ نا سلہ خلک و داایونٹ ءِ پاکستانی صنعت نا طاقت ءِ تالان کروک آ اسہ اہم ءُ مزل اس گوندا۔
