کوئٹہ۔ 06 فروری (اے پی پی) نیو گوادر انٹرنیشنل بالی پٹ(NGIA) آ اولیکو ہلہلہ ئی انخلاء نا مشق اس اڈ ہلک ہرانا مسخت مسافر آتا رکھ و آپریشنل تیاری تے پک کننگ ئس۔ دامشق بالی پٹ نا ڈیپارچرلاونج اٹی اڈ ہلک۔ ہرانا کماشی ءِ چیف فائر اینڈ ریسکیو آفیسر (سی ایف آراو) کرے، ہراایمرجنسی وڑوڈول آ سرجمی اٹ حوال تس۔ ترجمان نا جاری کروک بیا ن نا رداٹ دامشق اٹی پاکستان بالی پٹ اتھارٹی ، بالی پٹ سیکورٹی فورس، ایئرلائن، و گراؤنڈ ہینڈ لنگ ایجنسی نا نمائندہ غاک بشخ ہلکر۔ دااسیجائی کوشست آتا مسخت بالی پٹ نا ایمرجنسی ردعمل نا لائخی تے ہُننگ و گچین کننگ ئس، تانکہ غٹ عملہ گمانی تنکی حالیت آتا جوان وڑاٹ مقابلہ ءِ کننگ کن پورو وڑاٹ تیار مریر۔ مشق اٹی حقی زند انا ایمرجنسی منظرنامہ نا نقل ءِ کننگا، ہرانا کمک اٹ بشخ ہلوک آک ایواکوئیشن پروٹوکول ، مواصلاتی حکمت عملی، و چندی ٹیم تا نیام اٹ ہم گرنچی نا مشق کرے۔ (سی ایف آراو) ہمو مشق آتا اہمیت آ زور شاغا، ہرا مسافر و عملہ نا رکھ ءِ پک کننگ کن بھاز المی ءِ۔ (سی ایف آراو) ڈی حوال سیشن اٹی پارے، ’’نیو گوادر انٹرنیشنل بالی پٹ آ رکھ ننا اولیت ءِ۔ دا مشق داہیت انا درشانی ءِ کیک کہ نن غٹ مسافر آتیکن اسہ رکھوک و قابل پت سفر نا آزموندہ فراوان کننگ کن سنبرینگوک اُن۔ بالی پٹ انتظامیہ سیفٹی پروٹوکولز ءِ پین سوگو کننگ کن پین باقاعدہ مشق و ہیلکاری سیشن اڈ ایتک۔
