اسلام آباد۔ 06 فروری (اے پی پی) بنجائی وزیر واپار جام کمال خان جدہ ٹی پاکستان نا اولیکو سنگل کنٹری نمائش’’میڈ اِن پاکستان‘‘ نا بناءِ کرے، دا 3 دے برجاسلک۔ پنچ شنبے نادے آ وزارت نا جاری اعلامیہ نا رداٹ تاریخ اٹی اولیکو وار سعودی عرب اٹی سنگل کنٹری میڈاِن پاکستان نمائش اڈتننگانے، دانا دورانیہ مسہ دے مریک، دودا ٹی سعودی کمامدار ، کاروباری کمکاری نا مون آ دننگ و پاکستان نا متنوع صنعتی لائخی تے تالان کننگ نااہمیت نا زور شاغا۔ اوسعودی عرب نا کنڈآن نمائنش نا اڈتننگ اٹی بدل مفروک مخ تفی آ منت واری ءِہرفے۔ اونا پاننگ ئس کہ دانمائش پاکستان و سعودی عرب نا متکن آ تعلقداری نا شاہدی ءِ ہرا اسیجائی ایمان، دودوربیدہ ئی رشتہ و سٹریٹجک شریداری آ تالان ءِ ۔ وزیر واپار پارے کہ دا نمائش پاکستان نا گچین مصنوعات ہرافتے ٹی ٹیکسٹائل ، گوازی تا پڑ ، لائٹ انجینئرنگ ، خور، تعمیراتی مواد و ایلو بشخ آک اوار ءُ، و خذمت آتے سعودی عرب و ڈیہہ انا الس نا مون آ پیش کننگ ناپلیٹ فارم ءِ۔ اوسعودی عرب تون واپار و زرکاری نا تعلقداری تے مون آ دننگ کن حکومت نا عزم انا درشانی ءِ کرے۔ جام کمال خان پارے کہ پاکستان نا پدتموک صنعتی بنداو و متحرک زرگزران تین پہ تینی کمکار ی نا بے پناہ وارخواہی فراوان کیک خاص کر فوڈ سیکورٹی ، توانائی، معدنیات و انسانی وسیلہ غاتا بشخ آتیٹی بے پناہ وارخواہی ساڑی ءِ۔ اوپارے کہ ننا حکومت زرکاری آ تالان چاگڑدءِ مون آ دننگ کن سنبرینگوک ءِ و سعودی عرب تینا وژن 2030 نا رداٹ داوارخواہی تیان پبی فائدہ ہرفنگ کیک۔ اوسعودی عرب نا پاکستان اٹی زرکاری کن اسپیشل انویسٹمنٹ فیسلی ٹیشن کونسل نا کڑد ءِ ہم تالا ن کرے۔ وزیرواپار سعودی عرب اٹی 27 لکھ پاکستانی پردیسی تا خذمت آتا ستاءِ کرسا اوفتے ہڑتوم آ ملک آتا سوگو تعلقداری تا بنداو گوندا۔ اوپارے کہ تدوک آ پنچ سال آتیٹی 17 لکھ آن زیات پاکستانی کارندہ سعودی آ ہنار ہرا پاکستانی تیکن غٹ آن بھلا مزل مسنے۔ جام کمال خان نمائش اٹی پاکستانی نا جہانی شہرت یافتہ فٹبال مینو فیکچرنگ انڈسٹری ءِ ہم تالان کرے۔ او2034 فیفا ورلڈکپ نا مہمانداری ءِ کٹنگ آ سعودی عرب ءِ مبارکبادی تس و باوری کرفے کہ پاکستان دا بھلا ایونٹ کن فٹبال تیار کننگ نا تینا روایت ءِ برجاتخک، ننے یقین ءِ کہ فیفا 2034 کن ہم ننا شمولیت برجاسلک۔ جام کمال خان پاکستانی و سعودی کاروباری ادارہ غاتا نیام اٹ کمکاری آ زور شاغسا افریقہ، نیامی ایشیاو دے ٹک بعید اٹی اسیجائی ڈٹ آتا وارخواہی تے پٹنگ نا اہمیت ءِ تالان کرے۔ اوپارے کہ نن اواری اٹ پوسکن آ منڈی تے دریافت و سرسہب سہ فریقی شریداری قائم کننگ کینہ۔ بنجائی وزیر سعودی سرکڑدہ و کاروباری برادری نا منت واری ءِ ہرفسا پارے کہ دا نمائش ننا ملک آتا نیام اٹ ودوک آ زرگزرانی شریداری نا علامت ءِ۔ یات سلے کہ میڈاِن پاکستان نمائش اٹی 137 پاکستانی کمپنی بشخ ہلکنو۔ دانمائش اٹی نمان سعودی کمامدار، سفارتکار وکاروباری برادری نا باسک آک بشخ ہلکر۔ دادود پاکستان و سعودی عرب نا نیام اٹ شونہال و مربوط آخبت کن اسیجائی وژن ءِ تالان کیک۔
