اسلام آباد۔ 04 فروری (اے پی پی) وزیراعظم محمد شہباز شریف پارینے کہ مچ آ قوم (اینو) چارشنبے نادے آ کشمیری الس تون یکجہتی نا پبی درشانیءِ کیک، آجوئی نا تحریک اٹی کشمیری ایلم تتون تفوک اُن، حکومت نا زرگزرانی گام گیج آتا سوب آن کبینی 9 سال انا کم انگا کچ آ بسنے، غٹ تر توانائی تے زرگزرانی شرح نمو کن خڑچ کینہ ، سعودی عرب نا کنڈآن تیل انا موخر ادائیگی نا آسراتی کن اونا منت وار اُن، ہرچار آ صوبہ غاتیٹی کشاری خراج نا نفاذ نا منظوری آن آئی ایم ایف نا خواست پورو مس، کشاری خراج وخت انا گرج ءِ، یوٹیلیٹی اسٹورز آن بیدس روچہ پیکج اس اتنگک۔ وزیراعظم محمد شہباز شریف سے شنبے نادے آ داخیال آتا درشانی ءِ بنجائی کابینہ نا دیوان اٹی گپ وتران کرساکرے۔ وزیراعظم پارے کہ یوم یکجہتی کشمیر قومی جوزہ اتون اڈتننگک، آجوئی نا تحریک اٹی نن کشمیری ایلم تتون تفوک اُن، و خیبرآن کراچی اسکان پاکستان نا الس کشمیری تتون یکجہتی نا درشانی ءِ کیک ۔ وزیراعظم پوسکن آ سال انا بناء آ کبینی نا کچ پین کم مننگ آ بنجائی کابینہ نا باسک آک خاص کر فنانس ٹیم ءِ مبارکبادی تس۔ اوپارے کہ جنوری 2025اٹی کبینی نا کچ پین کم مرسا 2.4 درسد آ بسنے، کبینی 9 سال انا کم انگا کچ آ مننگ نا خیرمقدم ءِ کینہ۔ سال 2024نا بناٹی کبینی نا کچ 28.72درسد ئس، دسمبر 2024اٹی کبینی 4.1 درسداسکان کم مس، کبینی نا کچ انا پدریسہ کم مننگ بھاز ستاکڑزک۔ وزیراعظم پارے کہ کنوئی آ گڑاتا نرخ آتیٹی کمتی آن لس بندغ ءِ ریلیف ملنگ ءِ، پاکستان زرگزرانی سوگوی آن پد داسہ زرگزرانی شونداری نا کسر آ ہِننگ ءِ۔ وزیراعظم پارے کہ سعودی عرب ہرا پاکستان نا خڑک انگا ایلم ملک ءِ و پاکستان کن نیک است خواہی تخک۔ سعودی ڈل تدوک آ دے پاکستان نا دورہ ءِ کرے، سعودی عرب تیل انا درآمد آ اسہ سال اکن 1.2ارب ڈالر موخر ادائیگی نا آسراتی نا وخت ءُ پاس ءِ ودفینے۔ موخر ادائیگی ناآسراتی کن سعودی عرب نا منت وار اُن۔ داڑآن ننا زرمبادلہ نا کوڑی تے سوگوی ملک و زرکاری ٹی ودکی مریک۔ وزیراعظم پاکستان و سعودی فنڈ فار ڈویلپمنٹ نا نیام اٹ چندی بشخ آتیٹی سمجھوتہ غاتے ستاکڑزوک گوندسا پارینے کہ سعودی فنڈ اتون مانسہرہ ٹی واٹر سپلائی اسکیم کن 4 کروڑ 10 لکھ ڈالر نا ڈٹ آتیا دستخط مسنے۔ داکان بیدس 4 کروڑ ڈالر نا خڑچ آن کنگ سلمان ہسپتال ہم تفنگک۔ وزیراعظم کشاری خراج نا نفاذ نا منظوری آ ہر چار آ صوبہ غاتا منت واری ءِ ہرفسا پارے کہ سندھ و بلوچستان ہم کشاری خراج نا نفاذ نا منظوری ءِ تسنے۔ ہنداوڑ آئی ایم ایف نا کشاری خراج نا خواست پورو مسنے۔ کشاری خراج وخت انا خواست ءِ، پنجاب غٹ آن مست دا کاریم ءِ کرے۔ وزیراعظم ہرچار و وزیراعلیٰ تا منت واری ءِ ہرفے ہرافک بنجاپاکستان تون اواری اٹ پاکستان نا بھلا زمواری نا ادائیگی کن فیصلہ کرے۔ اوصدر آصف علی زرداری، مسکوہی وزیراعظم میاں محمد نواز شریف و بلاول بھٹو زرداری نا ہم منت واری ءِ ہرفے۔ وزیراعظم وزارت قومی غذائی رکھ و پٹ وپول ءِ پارت کرے کہ یوٹیلیٹی اسٹور آتیان بیدس روچہ پیکج اس تیار کننگے تانکہ کرپشن و خراب مال انا غاو دُوارہ مون آ بف۔ وزیراعظم پارے کہ کیہی تُو مست ای پارت کریسٹ کہ دا باندات مہالو آنبار چلینگ انگ کپک۔ تدوک آ روچہ ٹی بے پناہ غاو ئس ہنداسوب آن داسہ مائنس یوٹیلیٹی اسٹور اسکیم اتنگک۔ وزیراعظم پارے کہ انسداد پولیو مہم دُوارہ بناکرینے، صوبہ غاتون اواری اٹ پبی وڑاٹ پولیو نا انسداد کن مہم چلیفنگ انگ ءِ۔ وزیراعظم جمرود اٹی انسداد پولیو ٹیم آ جلہو نا واقعہ غا است ہسونی نا درشانی ءِ کرے ہراٹی اسہ پولیس کارندہ اس شہید مس۔ وزیراعظم کابینہ ءِ پارے کہ او تدوک آ دے کوئٹہ نا دورہ غا ئس۔ قلات اٹی اسہ کارروائی اسے ٹی 23 خوارج آتے جہنم رسید کننگا، خوارج آتون جنگ ترسا 18 ورناشہیدی نا جام ءِ نوش کریر۔ وزیراعظم پارے کہ اوٹھپی سیکورٹی کارندہ غاتا جان پڑسی ءِ کرے، اوفتا حوصلہ بڑزئس۔ وزیراعظم پارے کہ ورناتا ملک انا خاطر قربانی تا جوزہ و بدل مفروک عزم انا مچ آ قوم معترف ءِ، ملک و قوم اکن قربانی تروک آک قوم انا ہیروک ءُ، پاکستان نا فوج و الس دہشت گردی نا ناسور نا پورو چٹفنگ کن ہم کوپہ سلوک ءُ۔ وزیراعظم پارے کہ مستین اٹی دہشت گرد آتے ہِلنگ نا فاش غلطی و فیصلہ نا بھرم ءِ کنوئی تمنگ ءِ، پاکستان نا فوج، ایف سی، رینجرز و پولیس نا ورناک ہرا قربانی تننگ ءُ او فتے تاریخ اٹ روشنا لوز آتیٹی نوشتہ کننگک۔
