اسلام آباد۔ 03 فروری (اے پی پی) صدر مملکت آصف علی زرداری عوامی جمہوریہ چین نا صدر شی جن پنگ نا سلہ غا 4آن 8 فروری اسکان چین نا سرکاری دورہ ءِ کیک۔ ترجمان دفترخارجہ نا کنڈآن دوشنبےنادے آ داڑے جاری بیان نا رداٹ دورہ ٹی صدر مملکت بیجنگ اٹی صدر شی جن پنگ، وزیراعظم لی کیانگ و ایلو سینئر چینی راہشون آتون چینی سرکڑدہ غاتون اوڑدہی کیک۔ بیان نا رداٹ گپ وتران اٹی اقتصادی و واپاری کمکاری آ خاص چکار اتون انسداد دہشت گردی و سیکورٹی کمکاری، چین پاکستان اقتصادی راہداری (سی پیک) و آخبت نا رابطہ نا گام گیج آتا بابت پاک چین تعلقداری نا پورو دنگ انا جاچ ءِ ہلنگک۔ بیان اٹی مستی پاننگانے کہ ہڑتوم آ فریق آک جہانی و علاقائی جغرافیائی سیاسی منظرنامہ و کثیر الجہتی فورم تیا ہڑتوم آ کنڈآتا کمکاری آ ہم گپ وتران کیرہ۔ چینی حکومت نا خصوصی سلہ غا صدر مملکت چین نا صوبہ ہیلونگ جیانگ نا شار ہاربن اٹی نہہ می ایشین ونٹرگیمز نا بنائی دود اٹی ہم بشخ ہلیک۔ دادورہ پاکستان و چین نا نیام اٹ بڑزکو کہول انا ہن و برتا روایتءِ تالان کیک ہرا ہڑتوم آ ملک آتا ہمہ موسمی اسٹریٹجک کمکاری آ تالان شریداری ءِ سوگو کننگ کن گہری وابستگی نا عکاسی ءِ کیک۔ دا بنداوی فائدہ، سی پیک تون اوار اقتصادی و واپاری کمکاری ءِ مون آ دننگ و علاقائی امن، شونداری و سوگوی کن تینا اسیجائی عزم ءِ تالان کننگ کن تین پہ تینی کمکاری نا درشانی ءِ کیک۔
