اسلام آباد۔ 03 فروری (اے پی پی) وزیراعظم محمد شہباز شریف خیبرپختونخوا نا علاقہ بکر آباد و جمرود اٹی پولیو ٹیم تیا جلہو اتا ترندی اٹ مذمت ءِ کرسا پارینے کہ غٹ اڑاند آتیان پد ہم انسداد پولیو مہم پبی عزم اتون برجاسلک۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم پولیو ٹیم تیا جلہو اٹی رکھ آ سلوک پولیس کارندہ غاتا شہیدی آ ڈکھیائی و غم انا درشانی ءِ کرے و شہید آتیکن بخشش و خاہوت کن صبر واستقامت نا دعاکرینے۔ وزیراعظم پارے کہ تینا جون ءِ دلدست آ تخسا ملک آن پولیو نا مرض انا چٹفنگ نا مہم نا بشخ مروک آ پولیو ورکرآتے مچ آ قوم سلام پیش کیک۔ پولیو ٹیم و اوفتا رکھ آ سلوک سیکورٹی کارندہ غاتا قربانیک اسُل زیان مفسہ۔ وزیراعظم پارے کہ غٹ اڑاند آتیان پد ہم انسداد پولیو مہم پبی عزم اتون برجاسلک۔ نن ملک آن پولیو نا پورو چٹفنگ کن سنبرینگوک اُن۔
