کوئٹہ۔ 03 فروری (اے پی پی) وزیراعلیٰ بلوچستان میر سرفراز بگٹی پارینے کہ پاکستان نا برخلاف منظم سازش مننگ ءِ ننے چوکنا مننگ نا گرج ءِ، گپ وتران کن تیار اُن، ولے بیدادی نا کسر ءِ منپنہ، حکومت سنجیدگی اٹ گام گیج کننگ ءِ و امن وسوگوی کن غٹ وسیلہ غاتے کاریم اٹ اتنگ انگ ءِ، بنجا وصوبہ غاتا نیام اٹ ہم گرنچی اٹ شونداری و سوگوی نا ہدف آتے دوئی کننگک۔ داخیال آتا درشانی ءِ او امن وایمنی نا بابت بڑزکو کہولی دیوان آن تران کرساکرے۔ وزیراعلیٰ بلوچستان نا سیکورٹی حالیت و شونداری باندات آتیا گپ وتران کرے، داوخت آ ملکی سلامتی، بلوچستان اٹی امن و سوگوی، شونداری ڈٹ و ریاستی رٹ انا قیام نا بابت اہم امور آ تیا شرہ مس۔ میر سرفرازبگٹی قلات اٹی پیش بروک آ است ہسون واقعہ غا ڈکھیائی واست ہسونی نا درشانی ءِ کرساپارے کہ او خاہوت آتا غم اٹی بریبرنا شریک ءِ۔ اوپیدوار کرے کہ واقعہ ٹی اوار زموار آتے ہچ ءُ حالیت اسے ٹی بشخنگپک، و اوفتے اوفتا کروک نا سزا تننگک۔ بلوچستان اٹی برجاامن و سوگوی کن حکومتی گام گیج آتے مون آتخسا وزیراعلیٰ پارے کہ ڈائیلاگ نا کمک اٹ ویل آتا پائیدار ایسر اس کشنگ مریک ولے اگہ کس اس گپ وتران کن تیار اف و ریاستی کانود ءِ چیلنج کننگ ءِ تو ہچ ءُ حالیت اسے ٹی بیدادی نا موکل تننگ مفک۔ اودوٹوک لوز آتیٹی پارے کہ ریاست نا رٹ ءِ ہرحال اٹ برقرارتخنگک و کس اسے ہم بدامنی تالان کننگ نا موکل تفننگک۔ وزیراعلیٰ پارے کہ صوبہ نا تاریخ اٹی اولیکو وار میرٹ آ استاد و طبی عملہ بھرتی کننگانے، دااولیکو وار مسنے کہ ٹیچنگ نا اسہ نوکری اس ہم بہامتنے، لس بندغ حکومت نا دا گام انا ستاءِ کررینے و میرٹ آ مروک آ بھرتی تیا ات جمی نا درشانی ءِ کرینو۔ علاقائی و جہانی حالیت آتیا ہیت کرسا وزیراعلیٰ بلوچستان پارے کہ پاکستان نا برخلاف منظم سازش مننگ ءِ، ننے چوکنا مننگ نا گرج ءِ۔ اوپارے کہ دشمن مسہ جتا پڑتیا جنگ کننگ ءِ، اونا ہر حال اٹ مقابلہ ءِ کروئی مریک، گڑاس زموار توفک آتا کمک اٹ بیدادی نا کسر ءِ اختیار کننگ ءُ وخت اس کہ ریاست نا برخلاف خار تالان کننگ نا سازش ہم برجاءِ۔ وزیراعلیٰ سوشل میڈیا نا کمک اٹ ورناتا منفی ذہن سازی نا ویل ءِ ہم تالان کرساپارے کہ دشمن واکدار آک پوسکن آ ذرائع ابلاغ ءِ کاریم اٹ اتسا بلوچستان نا ورناتے گمراہ کننگ نا کوشست کننگ ءُ ولے حکومت و ریاستی ادارہ غاک داچیلنج آتیان جوانی اٹ معلومدار ءُ و اوفتا پبی مقابلہ ءِ کیرہ۔ بلوچستان اٹی برجابحالی امن نا کوشست آتے مون آتخسا وزیراعلیٰ پارے کہ حکومت سنجیدگی اٹ گام گیج کننگ اٹی ءِ و امن و سوگوی کن غٹ وسیلہ غاتے کاریم اٹ اتنگ ءِ۔ دیوان اٹی ڈپٹی وزیر اعظم محمد اسحاق ڈار، وزیر دفاع خواجہ محمد آصف، بنجائی وزیر حوالکاری عطا اللہ تارڑ ، سینٹر آغا شاہ زیب درانی ، باسک قومی اسمبلی جمال شاہ کاکڑ ، گورنر بلوچستان شیخ جعفر خان مندوخیل، صوبائی وزرا میر ظہور احمد بلیدی، میر سلیم خان کھوسہ، ترجمان بلوچستان حکومت شاہد رند، چیف سیکرٹری بلوچستان شکیل قادر خان، ایڈیشنل چیف سیکرٹری داخلہ شہاب الدین، پرنسپل سیکرٹری ٹو چیف منسٹر بابر خان، آئی جی پولیس معظم جاہ انصاری و ایلو کمامدارآک بشخ ہلکر۔
