دہشت گرد آک بلوچستان نا امن، شونداری و شونہالی نا دشمن ءُ، شرپسند زموار آتا لغور انگا کارروائیک صوبہ نا شونداری نا عزم ءِ متزلزل کننگ کپسہ، سی پیک نا پوروی آ کاریم ترندی ا ٹ برجاءِ، وزیراعظم شہباز شریف

کوئٹہ۔ 03 فروری (اے پی پی) وزیراعظم محمد شہباز شریف پارینے کہ دہشت گر د آک بلوچستان نا امن، شونداری و شونہالی نا دشمن ءُ، شرپسند زموار آتا لغور انگا کارروائیک صوبہ نا شونداری نا عزم ءِ متزلزل کننگ کپسہ، سی پیک نا پوروی آ کاریم ترندی اٹ برجاءِ، گوادر بندرگاہ نیامی ایشیاء و سویل دے ٹکی ایشیاو ایلو دنیا نا نیام اٹ پاکستان ءِ رابطہ غاتااہم ذریعہ جوڑ کننگ اٹ اہم ءُ کڑد  اس ادا کیک۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم بلوچستان اٹی امن و ایمنی نا حالیت آتیا جاچ دیوان نا کماشی ءِ کرساکرے۔ دیوان اٹی صوبہ نا امن و ایمنی نا حالیت، شونداری ڈٹ آتیا پیش رفت و ایلو اہم صوبائی امور آ حوال تننگا۔ دیوان اٹی نائب وزیراعظم و وزیرخارجہ اسحاق ڈار ، وزیردفاع خواجہ آصف، بنجائی وزیر حوالکاری و شینکاری عطاء اللہ تارڑ ، بنجائی وزیر بجلی اویس لغاری، قومی اسمبلی نا باسک جمال شاہ کاکڑ، گورنر بلوچستان شیخ جعفر خان مندوخیل، وزیراعلیٰ بلوچستان سرفراز بگٹی ، صوبائی وزیر محمد سلیم کھوسہ و تعلقدار بڑزکو کمامدارآک بشخ ہلکر۔ وزیراعظم پارے کہ دہشت گرد آک بلوچستان نا امن، شونداری و شونہالی نا دشمن ءُ۔دہشت گرد آک خواپسہ کہ بلوچستان نا مخلوق شونہال، ورناک تعلیم یافتہ و برسرروزگار مریر۔ بلوچستان نا شونداری نا سفر برجاسلک۔ وزیراعظم پارے کہ شرپسند زموار آتا لغور انگا کارروائیک حکومت نا بلوچستان نا شونداری نا عزم ءِ متزلزل کننگ کپسہ۔ بلوچستان نا شونداری حکومت نا اولیت آتیٹی اوار ءِ۔ بلوچستان اٹی جا ن جوڑی و تعلیم نا آب اٹ آسراتی، روزگارناوارخواہی فراوان کننگ کن گام گیج کننگ انگ ءِ۔ زوت آتے اٹ چین اٹی کشاری بشخ انا پوسکن آ تربیت کن مون تروک آ طالب علم آتیٹی بلوچستان نا طالب علم آتا خصوصی کوٹہ اس تخنگانے۔ وزیراعظم پارے کہ یوتھ پروگرام، وزیراعظم لیپ ٹاپ اسکیم نا کمک اٹ بلوچستان نا طالب علم آتے واکدار کننگ انگ ءِ۔ اوپارے کہ بلوچستان اٹی کشت وکشار نا شونداری کن کشاری ٹیوب ویل آتا شمسی توانائی آ گدریفنگانے۔ اللہ نا فضل و کرم اٹ سی پیک نا پوروی آ کاریم ترندی اٹ برجاءِ ۔ گوادر بالی پٹ آ جہاز آتا چرجوئی بناکرینے۔ گوادر بندرگاہ نیامی ایشیاء و سویل دے ٹکی ایشیا و ایلو دنیا نا نیام اٹ پاکستان ءِ اسہ اہم ءُ رابطہ اس جوڑ کننگ اٹ اہم کڑد ادا کیک۔ وزیراعظم پارے کہ عسکری سرکڑدہ، سپہ سالار، و پاکستان نا فوج حکومت تون اواری اٹ پرامن بلوچستان کن دے و نن کوشست کننگ ءُ۔ کنتون اوار مچ آ قوم بلوچستان نا امن کن کوشست سیکورٹی فورس، پولیس و ضلعی انتظامیہ  وایلو ادارہ غاتے خراج تحسین پیش کیک۔